Bir çox insan pəhriz və idmanla arıqlamağa çalışsa da, bəzən bütün səylərə baxmayaraq çəki itirmək mümkün olmur. 

Foodinfo.az xəbər verir ki, arıqlaya bilməmək yalnız qidalanma və hərəkətsizliklə bağlı deyil, bəzi hallarda bu, sağlamlıq problemlərinin xəbərçisi ola bilər.

Ən çox rast gəlinən səbəblərdən biri qalxanabənzər vəzinin (tiroidin) pozğunluqlarıdır. Hipotiroidizm zamanı orqanizm az hormon ifraz edir və bu da maddələr mübadiləsini yavaşladır. Nəticədə bədən daha az kalori yandırır və arıqlamaq çətinləşir.

Digər mümkün səbəb insulin müqavimətidir. Bu vəziyyətdə hüceyrələr insulini düzgün qəbul etmir, şəkər səviyyəsi tez-tez dəyişir və orqanizm yağ yığmağa meyilli olur. Belə insanlarda, xüsusilə qarın bölgəsində piylənmə müşahidə edilir.

Xroniki stress və yuxusuzluq da arıqlama prosesini ləngidə bilər. Stress zamanı kortizol hormonu yüksəlir, bu da həm iştahanı artırır, həm də bədəndə yağ toplanmasına səbəb olur.

Bundan başqa, bağırsaq mikroflorasının pozulması, hormonal balanssızlıq, böyrəküstü vəz xəstəlikləri və ya depressiya əleyhinə bəzi dərmanların istifadəsi də arıqlamanın qarşısını ala bilər.

Əgər balanslı pəhriz və müntəzəm fiziki fəaliyyətə baxmayaraq uzun müddət çəki itirmək mümkün olmursa, mütləq həkim müayinəsindən keçmək lazımdır. Sadə analizlər vasitəsilə hormon səviyyələri, şəkər dəyərləri və maddələr mübadiləsi yoxlanılaraq problemin səbəbi müəyyən edilə bilər.