Brüssel kələmi uzun illər bir çox insan üçün məktəb yeməkləri ilə assosiasiya olunub və sevilməyən tərəvəzlər siyahısında yer alıb. Son illər isə sağlam qidalanmaya marağın artması bu tərəvəzi yenidən gündəmə gətirib. Foodinfo.az “Rbc.ua” saytına istinadla xəbər verir ki, Brüssel kələmi xüsusilə qış aylarında daha faydalı olur və orqanizm üçün dəyərli təsir göstərir. Mütəxəssislər bildirirlər ki, dekabr-fevral ayları bu tərəvəzin ən keyfiyyətli dövrü hesab olunur.
Brüssel kələminin əsas üstünlüklərindən biri onun az kalorili olmasıdır. 100 qramında təxminən 40 kalori olan bu tərəvəz çəkisinə nəzarət edənlər üçün uyğun seçim sayılır. Tərkibindəki lif maddələri uzun müddət toxluq hissi yaradır və bağırsaqların fəaliyyətini yaxşılaşdırır. Qış aylarında az hərəkət nəticəsində yaranan köp və ağırlıq hissinin azalmasına da kömək edir.
Həkimlərin sözlərinə görə, Brüssel kələmi C və K vitaminləri ilə zəngindir. Bu vitaminlər immun sisteminin möhkəmlənməsində, sümüklərin sağlam qalmasında və qanın normal laxtalanmasında mühüm rol oynayır. Eyni zamanda tərkibində olan təbii qoruyucu maddələr orqanizmi iltihabi proseslərdən qorumağa kömək edir.
Mütəxəssislər qeyd edirlər ki, Brüssel kələmini həddindən artıq bişirmək məsləhət deyil. Az müddət buxarda bişirmə, sobada hazırlama və ya yüngül qızartma faydalı maddələrin qorunmasına imkan verir. Zeytun yağı, sarımsaq və limon suyu ilə birlikdə istifadə edildikdə isə dadı daha da artır.
Bu tərəvəzin qida rasionuna mütəmadi əlavə olunması qış aylarında həm immunitetin güclənməsinə, həm də həzm sisteminin daha sağlam işləməsinə müsbət təsir göstərir.
