Adi bir vərdiş kimi görünən yeməkləri həddindən artıq duzlamaq sağlamlıq üçün ölümcül nəticələr doğura bilər. Foodinfo.az xəbər verir ki, Daily Mail nəşri duzun normadan artıq qəbulu ilə bağlı təhlükələr barədə yazıb.

Mütəxəssislərin sözlərinə görə, bədəndə artıq duz suyun qan damarlarında toplanmasına səbəb olur və bu da qan təzyiqini yüksəldir. Yüksək təzyiq ürək-damar sisteminə güclü təsir göstərərək insult, infarkt kimi ağır xəstəliklərin yaranma riskini artırır. Bundan başqa, duzun çoxluğu sümükdə kalsium itkisinə gətirib çıxarır və bu da osteoporoza şərait yaradır. Hətta mədə xərçənginin yaranmasında da artıq duzun rolu xüsusi qeyd olunur.

Araşdırmalarda bildirilir ki, sağlam insan üçün duzun gündəlik norması 6 qramdan artıq olmamalıdır. Lakin böyüklərin çoxu bu həddi 40 faizdən çox aşaraq, gündə təxminən 8–8,5 qram duz qəbul edir. Bu isə orqanizmdə su-duz balansının pozulmasına, damar divarlarının qalınlaşmasına və qan dövranının zəifləməsinə gətirib çıxarır.

Həkimlər duzun miqdarını azaltmaq üçün yeməklərə ədviyyat və təbii ləzzətvericilər əlavə etməyi məsləhət görürlər. Xüsusilə pomidor, göbələk, mayalanmış məhsullar və müxtəlif göyərtilər yeməklərə həm ləzzət, həm də sağlamlıq baxımından fayda qatır.