Çay içmək bir çox ölkələrdə, xüsusilə də Azərbaycanda gündəlik vərdişə çevrilib. Lakin mütəxəssislər xəbərdarlıq edir ki, çox isti – 65°C-dən yuxarı temperaturda içilən çay və digər içkilər qida borusu xərçəngi riskini artıra bilər.

Foodinfo.az xəbər verir ki, Beynəlxalq Xərçəng Araşdırmaları Agentliyinin (IARC) apardığı araşdırmalarda məlum olub ki, yüksək temperaturda içilən içkilər selikli qişanı zədələyərək hüceyrələrin xərçəngə meyllənməsinə səbəb ola bilər. Çox isti içki içən insanlarda qida borusu xərçəngi riski içməyənlərlə müqayisədə iki dəfə yüksək olub.

Mütəxəssislərin fikrincə, təhlükə çayın tərkibində deyil, onun temperaturundadır. Yəni çay və ya digər isti içkilər normadan çox isti içildikdə zərərli təsir göstərə bilir.

Çay və qəhvəni dəmlənən kimi içmək olmaz, bir neçə dəqiqə soyumasını gözləmək lazımdır. Təhlükəsiz içmə temperaturu 55–60°C arasında sayılır.

Çox isti mayelərin uzunmüddətli istifadəsi qida borusuna davamlı ziyan vurur və xroniki iltihab yaradır.

Azərbaycanda çay süfrəsinin xüsusi yeri var və çox vaxt çay dəmlənən kimi içilir. Həkimlər hesab edir ki, bu adət dəyişdirilməlidir. Çay soyuduqdan sonra içmək həm dadını daha yaxşı hiss etməyə, həm də sağlamlığı qorumağa kömək edir.