Süd əksər insanlar üçün faydalı içki sayılsa da, bəzi hallarda orqanizm üçün zərərli ola bilər. Foodinfo.az xəbər verir ki, NİC “Sağlam qidalanma”nın icraçı direktoru, dietoloq və hepatoloq Nuriyə Diyanova “Gazeta.ru”ya açıqlamasında 3,2%-lik yağlı süddən tez-tez istifadə etməyin qaraciyərin sağlamlığına mənfi təsir göstərə biləcəyini bildirib.

Mütəxəssisin sözlərinə görə, 50 yaşdan yuxarı şəxslər həftədə üç dəfədən çox 3,2%-lik süd içdikdə qaraciyər xərçəngi riskinin yüksəlmə ehtimalı artır. O, vurğulayıb ki, bu təhlükənin əsas səbəbi südün tərkibindəki doymuş yağlar və transyağlardır.

Diyanova əlavə edib ki, bu riskə fermentasiya olunmuş süd məhsulları, məsələn, qatıq və kefir aid deyil. Çünki onların tərkibində zərərli yağlar olmur və əksinə, bağırsaq mikroflorasını yaxşılaşdırmaqla ümumi sağlamlığa müsbət təsir göstərir.

Mütəxəssis daha az yağlı süd növlərinə üstünlük verilməsini tövsiyə edib: “Ən azı 2,5%-lik südü seçmək daha məqsədəuyğundur. Bundan əlavə, alternativ içkilər də yaxşı seçim ola bilər”.

Onun sözlərinə görə, qaraciyərində problem olan, xüsusən də qeyri-alkoqollu piylənmə xəstəliyindən əziyyət çəkənlər üçün bitki əsaslı içkilər — məsələn, badam südü daha faydalıdır. “Belə insanlara gündəlik rasionlarına 10-15 qram badam və digər qoz-fındıq məhsulları əlavə etmək tövsiyə olunur”, — deyə o bildirib.