Kompot sadəcə sərinləşdirici içki deyil, həm də sağlamlıq üçün vitamin mənbəyidir. Foodinfo.az xəbər verir ki, qırmızı qarağatla hazırlanan bu içki immuniteti gücləndirir, maddələr mübadiləsini normallaşdırır və orqanizmi C vitamini ilə zənginləşdirir. Buna görə də, həm yay istisində, həm də qış aylarında soyuqlama zamanı bədəni dəstəkləmək üçün əla seçim sayılır.

Yaxşı qarağat necə seçilməlidir?
Rusiya kulinariya eksperti Yelena Maloçkina “Lenta.ru”ya bildirib ki, ideal kompotun sirri bazardan və ya mağazadan düzgün giləmeyvə seçməklə başlayır. Onun sözlərinə görə, qarağat ən yaxşı halda salxım şəklində alınmalıdır, çünki belə saxlananda daha az zədələnir və şirəsini qoruyur. Əsas meyarlar – giləmeyvənin parlaq rəngi, bərk quruluşu və təzə qoxusudur. Əgər giləmeyvələr asanlıqla qopursa, deməli onlar artıq yetişib və tez dağılacaq.

Hazırlıq mərhələsi – ən vacib addım
Mütəxəssis qeyd edir ki, qarağatı güclü su axını altında yumaq olmaz, çünki giləmeyvələr çox zərifdir və tez çatlayır. Onları salxım halında sərin suda yuyub, sonra diqqətlə saplaqlarından ayırmaq daha düzgündür. Bu mərhələ kompotun şəffaf və acılıqsız alınmasını təmin edir.

Klassik kompot resepti
Ən sadə üsul üçün 500 qram qırmızı qarağat, 150 qram şəkər və 2 litr su kifayətdir. Su və şəkəri birlikdə qaynadır, sonra giləmeyvələri əlavə edirsiniz. Bir daha qaynara düşən kimi qazanı oddan götürmək lazımdır. İsti halda bankalara doldurub qış üçün saxlamaq mümkündür.

Qara və ağ qarağatla fərqli dad
Maloçkinanın sözlərinə görə, ağ qarağat kompotun dadına bal kimi yumşaqlıq qatır, qırmızı isə ona tanış turşuluq və rəng bəxş edir. Əlavə olaraq, təzə melissa yarpaqları içkinin ətirini daha da zənginləşdirir. Əgər qarışığa qara qarağat qatılarsa, şəkərin miqdarı bir az azaldılmalıdır, çünki bu giləmeyvə təbii olaraq daha şirindir.

Giləmeyvə və meyvə qarışığı 
Qırmızı qarağatın dadını şaftalı, çiyələk və ya armudla birləşdirmək də mümkündür. Bu halda kompot həm rəngarəng, həm də vitamin baxımından daha zəngin alınır. Məsələn, 300 qram qarağat, 2 iri şaftalı, 150 qram çiyələk və bir az limon turşusu ilə hazırlanan qarışıq həm yay xatirəsini, həm də günəşli ətiri qışa daşıyır.

Qarağat və sitrus meyvələri ilə orijinal dad
Müasir reseptlər arasında portağal, limon və azacıq təzə zəncəfil əlavə edilən qarağat kompotu da xüsusi sevilir. Belə içki həm immuniteti möhkəmləndirir, həm də orqanizmi soyuq qış günlərində istiləşdirir.