Arıqlamaq istəyən insanların tez-tez buraxdığı səhvlərdən biri səhər yeməyi seçimidir. Bəzi qidalar sağlam görünsə də, əslində çəki atma prosesini ləngidə və hətta daha çox yeməyə səbəb ola bilər.
Foodinfo.az xəbər verir ki, ağ undan hazırlanmış şirin bulkalar və kruassanlar günə sürətli enerji versə də, qanda şəkərin tez yüksəlib düşməsinə səbəb olur. Bu isə qısa müddət sonra yenidən aclıq hissi yaradır.
Eyni vəziyyət şəkərli səhər yeməyi taxıllarında da müşahidə olunur. Reklamlarda faydalı kimi təqdim olunsa da, onların tərkibində şəkər çox, lif isə az olur.
Paket şirələr də tez-tez səhər yeməyinə əlavə edilir. Lakin mütəxəssislər qeyd edir ki, bu məhsullar lifdən məhrumdur və yüksək şəkər tərkibi ilə seçilir. Nəticədə insan kalori qəbul etsə də, toxluq hiss etmir.
Ağ çörək üzərinə çəkilən cem və ya şokolad kremi də arıqlamağa mane olan seçimlər sırasındadır. Sadə karbohidratlarla zəngin bu cür qidalar enerji səviyyəsini tez aşağı salır və gün ərzində daha çox yeməyə səbəb olur.
Bəzi insanlar isə səhər yeməyini ümumiyyətlə atlayaraq yalnız qəhvə ilə kifayətlənir. Bu vərdiş metabolizmi zəiflədir və günün sonrakı saatlarında həddindən artıq qida qəbuluna gətirib çıxarır.
Sonda qeyd edək ki, düzgün seçilmiş səhər yeməyi arıqlama prosesində mühüm rol oynayır və balanslı qidalanma sağlam nəticələr əldə etməyə kömək edir.
