Yaz aylarında orqanizmin ehtiyacları dəyişir və bu dövrdə düzgün qidalanma sağlamlığın qorunmasında mühüm rol oynayır. Havanın isinməsi ilə yanaşı, vitamin çatışmazlığının qarşısını almaq üçün gündəlik menyunu yenidən nəzərdən keçirmək tövsiyə olunur.

Foodinfo.az BB.lv saytına istinadla xəbər verir ki, yaz mövsümündə immunitet sistemini gücləndirmək üçün xüsusilə bəzi vitaminlərə diqqət yetirmək lazımdır. Mütəxəssislər bildirirlər ki, düzgün seçilmiş qidalar həm enerji səviyyəsini artırır, həm də mövsümi xəstəliklərdən qorunmağa kömək edir.

C vitamini immunitetin möhkəmlənməsində əsas rol oynayır və bu vitamin təkcə sitrus meyvələrində deyil, həm də bolqar bibəri, cəfəri, Brüssel kələmi, kivi, itburnu və qara qarağatda bol olur.

D vitamini isə erkən yazda günəş şüalarının az olması səbəbindən kifayət qədər sintez olunmur. Buna görə də rasiona yağlı balıq növləri, dəniz məhsulları, yumurta, süd məhsulları, göbələk, qaraciyər və quş əti əlavə etmək tövsiyə edilir.

E vitamini hormonal balansın qorunmasına və xolesterinin tənzimlənməsinə kömək edir. Onun mənbələri arasında günəbaxan tumları, bitki yağları, brokkoli, qulançar, ispanaq, avokado, həmçinin krevet və balıq yer alır.

A vitamini görmə qabiliyyətinin, immun sisteminin, həmçinin dəri və saç sağlamlığının qorunması üçün vacibdir. Bu vitamin kök, kələm, balqabaq, ispanaq, quru ərik, qaraciyər, yağlı balıq, süd məhsulları və yumurtada geniş yayılıb.

B qrupu vitaminləri isə enerji mübadiləsi və iş qabiliyyəti üçün əvəzolunmazdır. Bu vitaminləri tam taxıl məhsulları, süd məhsulları, yumurta, ət, balıq, qoz-fındıq, göyərti və paxlalı bitkilərdən almaq mümkündür.

Mütəxəssislər qeyd edirlər ki, yaz aylarında balanslı və müxtəlif qidalanma orqanizmi zəifləməkdən qoruyur və ümumi sağlamlıq vəziyyətini yaxşılaşdırır.