Bir çox insan səhərlər dərmanlarını qəhvə ilə içməyi vərdiş halına salıb. Foodinfo.az bildirir ki, bu vərdiş bəzi hallarda dərmanın təsirini azalda və ya artıraraq orqanizm üçün təhlükəli ola bilər. Qəhvə tərkibindəki kofein səbəbilə dərmanların sorulmasını dəyişə bilər.
Məsələn, bəzi antibiotiklərin təsiri kofeinlə birlikdə zəifləyə bilər. Digər tərəfdən, qəhvə bəzi ağrıkəsici dərmanlarla birlikdə qəbul edildikdə onların sinir sisteminə təsirini artıra bilər. Bu isə əsəbilik, ürək döyüntüsündə artım və təzyiqin qalxması kimi simptomlarla özünü göstərə bilər.
Həmçinin, mədə qoruyucu dərmanlarla birlikdə içildikdə qəhvə turşuluq yaratdığı üçün onların təsirini azalda bilər. Qəhvə bəzi dərmanların qaraciyərdə parçalanma sürətini artıraraq onların qanda miqdarını azalda bilər. Bu isə müalicə prosesini uzada və nəticəni zəiflədə bilər.
Qəhvə ilə birlikdə qəbul edilən dəmir və maqnezium tərkibli preparatlar isə bədəndə sorulmadan atıla bilər. Mütəxəssislər dərman qəbulundan əvvəl və sonra ən azı 1 saat qəhvə içməməyi məsləhət görürlər. Nəticə olaraq, qəhvə ilə dərman qəbul etmək təhlükəsiz görünə bilər, amma ciddi nəticələrə səbəb ola bilər.
