Sarıkök iltihabəleyhinə və antioksidant təsiri ilə tanınsa da, mütəxəssislər bu ədviyyatın nəzarətsiz istifadəsinin bəzi sağlamlıq problemlərinə yol aça biləcəyini bildirirlər. Xüsusilə son illər sarıkökün əlavə və kapsul formasında geniş yayılması riskləri daha da artırır.
Foodinfo.az xəbər verir ki, sarıkökün yüksək dozada qəbulu mədə-bağırsaq sisteminə mənfi təsir göstərə bilər. Bu zaman mədə yanması, ürəkbulanma, ishal və qarın ağrıları müşahidə oluna bilər. Qastrit və reflüks xəstəliyi olan şəxslərdə bu təsirlərin daha kəskin keçdiyi qeyd olunur.
Sarıkökün qan durulaşdırıcı təsirə malik olduğu bildirilir. Bu səbəbdən qan durulaşdırıcı dərmanlar qəbul edən şəxslərdə və cərrahi əməliyyatdan əvvəl sarıkök istifadəsi əlavə risk yarada bilər.
Bu məhsul öd axınını artırdığı üçün öd daşı və öd kisəsi problemləri olan şəxslərdə ağrıları gücləndirə bilər. Bundan əlavə, bəzi insanlarda allergik reaksiyalar — dəri səpkisi, qaşınma və şişkinlik — müşahidə oluna bilər.
Həmçinin, sarıkök dəmirin orqanizmdə sorulmasını azalda bilər. Bu isə xüsusilə anemiya problemi olan şəxslər üçün risk yarada bilər.
Hamilə qadınlara sarıkökdən çox istifadə etməmək tövsiyə edilir. Qida miqdarında istifadənin adətən təhlükəsiz olduğu bildirilsə də, əlavə və konsentrat formalar yalnız həkim məsləhəti ilə qəbul edilməlidir.
Bir sözlə, sarıkök faydalı ədviyyat olsa da, düzgün doza və fərdi sağlamlıq vəziyyəti nəzərə alınmadan istifadə edildikdə yan təsirlərə səbəb ola bilər. Buna görə də ölçülü və şüurlu istifadə tövsiyə olunur.
