Kastor yağı son illər saç baxımında ən çox istifadə olunan təbii vasitələrdən biri kimi tanınır. Sosial mediada bu yağın saçları sürətlə uzatdığı və tökülməni dayandırdığı iddia edilsə də, mütəxəssislər məsələyə daha real və elmi yanaşmağın vacibliyini vurğulayırlar.

Foodinfo.az xəbər verir ki, kastor yağı tərkibindəki risinoleik turşu sayəsində saç dərisində qan dövranını stimullaşdırır. Bu da saç köklərinin daha yaxşı qidalanmasına şərait yaradır və saçların daha güclü çıxmasına dəstək olur.

Kastor yağı saçın birbaşa uzanma sürətini artırmasa da, saç qırılmasını azaltdığı üçün saçlar daha sağlam və dolğun görünür. Eyni zamanda qalın teksturası saç telini örtərək parlaqlıq və elastiklik qazandırır.

Kastor yağının antibakterial və göbələk əleyhinə xüsusiyyətləri saç dərisində kəpək və quruluğun azalmasına kömək edir. Bu xüsusiyyət xüsusilə quru və həssas saç dərisi olanlar üçün faydalı hesab olunur.

Kastor yağı çox qatı olduğu üçün təkbaşına və tez-tez istifadə edildikdə saç dərisində məsamələri tıxaya və ağırlıq hissi yarada bilər. Bu səbəbdən onu zeytun, badam və ya hindqozu yağı ilə qarışdıraraq, həftədə 1–2 dəfə tətbiq etmək daha məqsədəuyğundur.

Bu yağ saç baxımında köməkçi vasitə kimi istifadə oluna bilər, lakin ciddi və uzunmüddətli saç tökülməsi zamanı yalnız təbii yağlara güvənmək düzgün deyil. Belə hallarda dermatoloq məsləhəti vacib hesab olunur.