Son illər sosial şəbəkələrdə və mediada müxtəlif pəhriz növləri sürətlə populyarlaşır. Lakin həkimlər bildirirlər ki, bir insanda müsbət nəticə verən pəhriz, başqasında həm təsirsiz qala, həm də sağlamlıq problemlərinə yol aça bilər. 

Foodunfo.az xəbər verir ki, bunun əsas səbəbi hər insan orqanizminin fərqli işləməsidir. Bu fərqlərin başında genetik xüsusiyyətlər dayanır. Genlər maddələr mübadiləsinin sürətini, yağ və karbohidratların necə istifadə edildiyini müəyyən edir. Buna görə də eyni qida bir insanda çəki itkisinə səbəb olduğu halda, digərində kökəlməyə yol aça bilər.

Hormonal balans da pəhrizin təsirini dəyişən əsas amillərdəndir. Xüsusilə insulin müqaviməti, qalxanabənzər vəzi problemləri və stress hormonları bədənin qidalara reaksiyasını fərqləndirir. Bu cür problemlər olduqda standart pəhrizlər gözlənilən effekti verməyə bilər.

Bağırsaq mikrobiotası – yəni bağırsaqlardakı faydalı bakteriyaların tərkibi – də pəhrizin uğurunda mühüm rol oynayır. Hər kəsin mikrobiotası fərqli olduğu üçün eyni qidalar müxtəlif insanlarda fərqli şəkildə həzm olunur və təsir göstərir.

Yuxu rejimi, fiziki aktivlik, stress səviyyəsi və gündəlik vərdişlər pəhrizin nəticəsini birbaşa təsir altına alır. Az yatan və yüksək stress altında olan şəxslərdə ən ideal pəhriz belə istənilən nəticəni verməyə bilər.

Bir sözlə, hamı üçün ideal pəhriz anlayışı mövcud deyil. Ən doğru yanaşma fərdi ehtiyaclara uyğun, sağlam və davamlı qidalanma planı seçməkdir. Bu səbəbdən mütəxəssislər pəhrizə başlamazdan əvvəl fərdi sağlamlıq vəziyyətinin nəzərə alınmasını tövsiyə edirlər.