Soyuq mövsümdə doğru qidalanma təkcə immuniteti deyil, həm də tənəffüs yollarını qorumağın əsas şərtlərindən biri hesab olunur. Foodinfo.az xəbər verir ki, mütəxəssislər sadə və əlçatan məhsul olan almaların ağciyərlərin müdafiəsində mühüm rol oynadığını bildirirlər. Dietoloq Lüdmila Denisenko qeyd edir ki, gündə ən azı bir alma yemək tənəffüs sisteminin daha sağlam işləməsinə kömək edir və respirator xəstəliklərə yoluxma riskini azaldır.

Onun sözlərinə görə, bu təsir almanın tərkibindəki antioksidantlar, pektin və təbii vitaminlərlə əlaqəlidir və xüsusilə payız-qış mövsümündə daha nəzərəçarpandır. Mütəxəssis vurğulayır ki, alma təkcə viruslardan deyil, həm də tütün tüstüsü və çirkli hava kimi xarici təsirlərin zərərindən qoruyur. Qış aylarında havadakı zərərli hissəciklərin çoxalması fonunda bu meyvənin rolu daha da artır və gündəlik rasionda mütləq yer almalıdır.

Denisenko bildirir ki, ən faydalı meyvələr yaşadığımız iqlimdə yetişənlərdir və ağacdan dərilib təbii halda yeyilən almalar orqanizm üçün daha uyğun sayılır. Bu meyvələrdəki mineral maddələr və vitaminlər insan bədəninin ehtiyaclarına daha uyğun nisbətdə toplanır. Ekspert tövsiyə edir ki, almanı seçərkən parlaq, süni görünüşlü və üzərində mum qatı olan meyvələrdən uzaq durmaq lazımdır, çünki belə məhsulların saxlanma müddəti uzadılmaq üçün kimyəvi maddələrdən istifadə olunmuş ola bilər. Yerli və təbii almaların isə immuniteti gücləndirməklə yanaşı, tənəffüs yollarının iltihabdan qorunmasına da müsbət təsir etdiyi bildirilir.

Dietoloqlar hesab edir ki, almanı çiy halda, qabığı soyulmadan yemək daha yaxşıdır, çünki onun ən qiymətli maddələri məhz qabığa yaxın təbəqədə toplanır. Beləliklə, almalar həm soyuqdəymə dövründə, həm də ümumi sağlamlığın qorunmasında əlçatan və təsirli seçim hesab edilir.