Bəzi sahiblər düşünür ki, təbiətdə tapılan göbələklər insan üçün zərərsizdirsə, it üçün də təhlükəsiz ola bilər.
Foodinfo.az xəbər verir ki, Rusiya Kinologiya Federasiyasının prezidenti, kinoloq Vladimir Qolubev bu fikrin tamamilə yanlış olduğunu bildirib və göbələklərin itlər üçün ən təhlükəli qidalardan biri olduğunu vurğulayıb. Onun sözlərinə görə, hətta insan üçün yeyilə bilən göbələklər belə, itlərin orqanizmi üçün çox “ağır” və həzm olunması çətin qidadır.
Mütəxəssis deyib ki, təlim keçən xüsusi itlər belə göbələk tapanda onları yeməmək üçün əvvəlcədən öyrədilir. “Məsələn, trüfel axtaran itlər ilk növbədə dəyərli göbələyi götürməməyə və udmamağa öyrədilir”, – Qolubev RİAMO-ya müsahibəsində bildirib. Bu, göbələklərin heyvanlar üçün nə qədər təhlükəli olduğunun bariz göstəricisidir.
Onun sözlərinə görə, istər meşədən yığılmış, istərsə də yemək üçün hazırlanmış göbələk olsun, hər biri itin orqanizminə ciddi ziyan vura bilər. Göbələklərdəki toksinlər qaraciyər, mədə-bağırsaq sistemi və sinir sisteminə zərbə endirərək zəhərlənmə, qusma, ishal, halsızlıq, hətta qıcolma və ölümə səbəb ola bilər. Üstəlik, itlər göbələyi çeynəmədən udduğuna görə, toksinlər çox tez qana qarışır və təsir daha sürətli baş verir.
Qolubev xəbərdarlıq edir ki, itin göbələk yediyi hiss edilərsə, “bir az gözləyək, bəlkə keçər” yanaşması yolverilməzdir. Onun sözlərinə görə, belə hallarda vaxt itirmədən dərhal baytar klinikasına müraciət etmək lazımdır. Erkən tibbi müdaxilə itin həyatını xilas edə bilər.
Mütəxəssis sahiblərə məsləhət görür ki, gəzinti zamanı itləri nəzarətsiz buraxmasınlar və torpaqdan iylənən, xüsusilə nəmli yerlərdə bitən göbələklərə yaxınlaşmasına imkan verməsinlər. O, həmçinin xatırladır ki, bəzi göbələklər insan üçün təhlükəsiz görünə bilər, lakin heyvanların orqanizmi tam fərqli reaksiya verə bilər.
Kinoloqların fikrincə, ən yaxşı qorunma üsulu profilaktikadır: itə “yerdən heç nə götürmə” vərdişi öyrədilməli və sahib hər zaman diqqətli olmalıdır. Çünki sadə bir göbələk – qiymətli dostun həyatına başa gələ bilər.
