Düzgün qurulan gündəlik qidalanma həm çəkinin azalmasına, həm də xroniki xəstəliklərin nəzarətdə saxlanmasına mühüm töhfə verir. Mütəxəssislər bildirirlər ki, balanslı və ölçülü rasion sağlam həyatın əsas şərtlərindən biridir. Foodinfo.az РИАМО saytına istinadla xəbər verir ki, qastroenteroloq Yekaterina Kaşux arıqlamaq və sağlamlığı qorumaq üçün “Harvard boşqabı” prinsipinə əməl etməyi tövsiyə edir.

Onun sözlərinə görə, bu prinsipə əsasən boşqabın yarısını tərəvəzlər, göyərti və meyvələr təşkil etməlidir. Dörddə biri tam taxıllı yarmalara, digər dörddə biri isə zülal mənbələrinə – ət və ya balığa ayrılmalıdır. Həkim vurğulayıb ki, həmçinin gündəlik enerji miqdarına nəzarət etmək, orqanizmin normal fəaliyyəti üçün lazım olan qədər enerji qəbul etmək vacibdir.

Mütəxəssis qeyd edib ki, bu yanaşma artıq qidalanmanın qarşısını alır, çəkinin tənzimlənməsinə kömək edir və ümumi sağlamlığın qorunmasına dəstək verir. Sadə və aydın prinsiplərə əməl etməklə hər kəs gündəlik menyusunu daha faydalı və balanslı qura bilər.