Məqsədlərə çatmaq təkcə motivasiya və zamanla ölçülmür, insanın düşüncə tərzi və davranış yönümü də burada mühüm rol oynayır. Foodinfo.az xəbər verir ki, Almaniyanın Trier Universitetinin psixoloqları apardıqları araşdırmada insanların uğur səviyyəsinin onların “fəaliyyətə yönümlü” və ya “düşünməyə yönümlü” olmasından asılı olduğunu müəyyən ediblər.

Tədqiqatçılar bildiriblər ki, fəaliyyətə yönümlü insanlar plan qurmaqdan əməli addımlara keçməkdə daha çevik olurlar. Onlar məqsədlərinə doğru hərəkətə başlamaqda çətinlik çəkmir, xüsusən də stresli şəraitdə daha qərarlı davranırlar.

Əksinə, düşünməyə yönümlü insanlar çox vaxt uzunmüddətli analiz və tərəddüdlər içində qalır, bu isə real addımların gecikməsinə səbəb olur. Psixoloqların fikrincə, bu cür insanlar uğura deyil, daha çox mümkün risklərə və səhvlərə fokuslanırlar.

Araşdırmada qeyd olunur ki, “kim Everesti fəth edəcək?” sualının cavabı insanın düşüncə modelində gizlidir. Fəaliyyətə yönümlü şəxs üçün bu, sadəcə növbəti sınaqdır, amma düşünməyə yönümlü şəxs üçün bu, keçilməz maneə kimi görünür.

Mütəxəssislər vurğulayıblar ki, çətin məqsədlərə çatmaq üçün hərəkətə başlama instinktini inkişaf etdirmək, yəni mükəmməl plan gözləmədən ilk addımı atmaq vacibdir. Kiçik addımların belə insanın özünə inamını artırdığı, nəticədə isə böyük məqsədləri gerçəkləşdirdiyi bildirilib.

Psixoloqlar həmçinin qeyd ediblər ki, real fəaliyyət planı olmayan motivasiya çox zaman qısaömürlü olur. Buna görə də uğur üçün əsas açar – düşüncədən əmələ keçmək vərdişini formalaşdırmaqdır.