Restoranda yemək yedikdən sonra bir çox insan qarında ağırlıq, güclü susuzluq və yuxululuq hiss etdiyini deyir. Bu hal təsadüfi deyil və qidaların tərkibi ilə birbaşa bağlıdır. Foodinfo.az Sports.kz-ə istinadən xəbər verir ki, nutrisoloq Veronika Qusakovanın sözlərinə görə, bu vəziyyət şərti olaraq “restoran yeməyi sindromu” adlandırılır. Mütəxəssis bildirir ki, restoran yeməklərində duzun miqdarı ev yeməkləri ilə müqayisədə xeyli çox olur. Güclü dad yaratmaq və müştərini yenidən cəlb etmək üçün aşpazlar tez-tez dad gücləndiricilərdən istifadə edirlər.

Nutrisoloqun fikrincə, artıq duz orqanizmdə mayenin saxlanmasına səbəb olur və bu da susuzluq hissini gücləndirir. Bundan əlavə, restoran yeməklərində gizli şəkərlər və qlutamatla zəngin karbohidratların birləşməsi insanın daha sürətlə və normadan artıq yeməsinə gətirib çıxarır. Nəticədə qida yaxşı çeynənmir və həzm prosesi çətinləşir. Qanda şəkərin səviyyəsi əvvəlcə sürətlə qalxır, sonra isə kəskin düşür ki, bu da yuxululuq yaradır.

Qusakova həmçinin restoran yeməklərində gizli yağların çoxluğuna diqqət çəkir. Onun sözlərinə görə, tavalara, souslara və marinadlara bol miqdarda yağ əlavə olunur və hətta adi tərəvəz salatı belə iki xörək qaşığı yağ hesabına yüzlərlə əlavə kalori verə bilər. Digər bir problem isə lif çatışmazlığıdır. Çünki restoranlarda tez-tez ağ düyü, ağ çörək, makaron və kartof püresi kimi təmizlənmiş məhsullar üstünlük təşkil edir. Bu isə köpmə, ağırlıq hissi və şəkər səviyyəsində dalğalanmaları daha da artırır.