Çuğundur şirəsi uzun illərdir yüksək qan təzyiqinə qarşı təbii vasitə kimi təqdim olunur. Bəs bu içki həqiqətən təzyiqi aşağı salmağa kömək edirmi və onu dərmanların əvəzinə istifadə etmək olarmı?

Foodinfo.az xarici mətbuata istinadla xəbər verir ki, fitokimya üzrə mütəxəssis, əczaçılıq elmləri namizədi İqor Sokolski çuğundurun sağlamlıq üçün faydalı tərəvəzlərdən biri olduğunu bildirib.

Onun sözlərinə görə, çuğundurun tərkibində damar divarlarını möhkəmləndirən və antioksidant təsir göstərən antosianlar adlı polifenol birləşmələri mövcuddur. Bundan əlavə, tərəvəz qida lifləri ilə zəngindir ki, bu da bağırsaqların fəaliyyətinin yaxşılaşmasına və ümumi sağlamlıq vəziyyətinin dəstəklənməsinə kömək edir. Mütəxəssis qeyd edib ki, çuğundurun müntəzəm istehlakı arterial təzyiqin normallaşmasına müəyyən dərəcədə müsbət təsir göstərə bilər.

Lakin ekspert vurğulayıb ki, nəzərəçarpacaq terapevtik təsir əldə etmək üçün çuğundur şirəsini böyük miqdarda qəbul etmək tələb oluna bilər. Bu isə hər insanın orqanizmi tərəfindən eyni dərəcədə yaxşı qarşılanmır. Həddindən artıq qəbul mədə-bağırsaq sistemini qıcıqlandıra, xüsusilə qastrit, xora və ya həssas bağırsaq sindromu olan şəxslərdə narahatlıq yarada bilər.

Mütəxəssis əlavə edib ki, bəzi insanlarda çuğundur allergik reaksiyalara səbəb ola bilər. Həmçinin sidik və nəcisin qırmızı rəng alması mümkündür ki, bu da təhlükəli olmasa da, narahatlıq yarada bilər.

İqor Sokolski bildirir ki, diaqnozu qoyulmuş hipertoniya zamanı yalnız çuğundura güvənmək düzgün deyil. Çuğundur şirəsi həkim tərəfindən təyin olunan müalicəni əvəz edə bilməz. Bununla belə, sağlam qidalanmanın tərkib hissəsi kimi çuğundur orqanizmi faydalı mikroelementlərlə təmin edir, bağırsaqların fəaliyyətini dəstəkləyir və qan təzyiqinin normal səviyyədə saxlanmasına kömək edə bilər.