Alimlər müəyyən ediblər ki, bəzi zülal növləri ilə zəngin qidalanma bağırsaqlarda təhlükəli infeksiyaların yaranma riskini azalda bilər. Aparılan araşdırmalar göstərir ki, qida rasionunun tərkibi xəstəlik törədicilərinin orqanizmdə yayılmasına birbaşa təsir edir. Foodinfo.az Gazeta.ru saytına istinadla xəbər verir ki, Kaliforniya Universitetinin tədqiqatçıları zülalla zəngin qidaların xolera törədicisinin bağırsaqda möhkəmlənməsinin qarşısını ala bildiyini açıqlayıblar.

Məlumata görə, təcrübələr siçanlar üzərində aparılıb və müxtəlif qidalanma növlərinin təsiri müqayisə edilib. Yağlı, karbohidratlı və zülallı qidalar arasında ən güclü qoruyucu təsir məhz bəzi zülal növlərində müşahidə olunub. Süd mənşəli zülal və buğda tərkibli zülalla zəngin rasion zamanı bağırsaqda infeksiya yaradan bakteriyaların sayı dəfələrlə azalıb.

Alimlər bildirirlər ki, bu təsir yalnız zülalın miqdarı ilə bağlı deyil. Sözügedən zülallar bakteriyaların əsas hücum mexanizmini zəiflədərək onların toksin yaymaq və bağırsaqda çoxalmaq qabiliyyətini azaldır. Nəticədə infeksiyanın inkişafı ciddi şəkildə məhdudlaşır.

Araşdırmada qeyd olunur ki, yağlı qidalar infeksiyanın gedişinə demək olar ki, təsir etməyib, karbohidratlar isə zəif nəticə göstərib. Bu da qidalanmada zülal növünün düzgün seçilməsinin nə qədər vacib olduğunu ortaya qoyur.

Mütəxəssislər xatırladırlar ki, xolera xüsusilə təmiz içməli suya çıxışın məhdud olduğu bölgələrdə hələ də ciddi təhlükə olaraq qalır. Hazırda əldə olunan nəticələr heyvanlar üzərində aparılan təcrübələrə əsaslansa da, alimlər gələcək tədqiqatlarda bu təsirin insanlarda da özünü göstərə biləcəyini istisna etmirlər.