Quru meyvələr faydalı qidalar sırasında yer alsa da, həkimlər onların hər kəs üçün uyğun olmadığını bildirirlər. Foodinfo.az xəbər verir ki, xüsusilə quru ərik mədə və bağırsaq problemləri yaşayan şəxslərə zərər verə bilər.

Mütəxəssislərin sözlərinə görə, quru ərik yüksək lif tərkibinə malikdir. Bu isə həzm sistemi həssas olan insanlarda ishal və köp kimi narahatlıqlara səbəb ola bilər. Bundan əlavə, mədə turşuluğu və ya xora xəstəliyi olanların bu məhsulu az istifadə etməsi məsləhət görülür.

Quru ərik həm də şəkərin miqdarına görə diqqət tələb edir. Şəkərli diabetdən əziyyət çəkənlər quru əriki gündəlik qida rasionuna yalnız həkim məsləhəti ilə əlavə etməlidirlər. Çünki artıq istifadə qan şəkərinin yüksəlməsinə səbəb ola bilər.

Mütəxəssislər qeyd edirlər ki, sağlam insanlar üçün də quru ərikin miqdarı ölçülü olmalıdır. Bir ovucdan çox yemək artıq kalori yığılmasına gətirib çıxarır. Quru əriki daha faydalı etmək üçün onu su ilə yuyaraq istifadə etmək tövsiyə olunur.

Beləliklə, quru ərik faydalı qida hesab olunsa da, hər kəs üçün uyğun deyil. Xüsusilə həzm problemi və şəkər xəstəliyi olanlar bu məhsuldan ehtiyatla istifadə etməlidirlər.