Son tədqiqatlar göstərir ki, ağır depressiya yalnız beynin işindəki pozğunluqlarla deyil, həm də immun sistemindəki disbalanslarla bağlıdır. Foodinfo.az xəbər verir ki, bu nəticəyə Cənubi Koreyanın KAIST universitetinin alimləri gəlib və araşdırmalarını Gazeta.ru saytına təqdim ediblər.
Tədqiqatçılar “immuno-neyron oxu disbalansı” adlandırdıqları yeni bir mexanizmi açıqlayıblar. Bu mexanizm depressiyanın terapiyaya davamlı olmasının səbəbini izah edə və yeni dərmanların hazırlanmasına yol aça bilər. Nəticələr Advanced Science jurnalında dərc olunub.
Araşdırma Çinju Xan rəhbərliyində aparılıb və İnha Universitetinin Tibb Məktəbi ilə əməkdaşlıq çərçivəsində həyata keçirilib. Alimlər qan, immun hüceyrələri və xəstələrin induksiya olunmuş pluripotent kök hüceyrələrindən yaradılmış beyin orqanidlərini analiz ediblər.
Xüsusilə gənc qadınlarda müşahidə olunan a-tipik depressiya əlamətləri — artırılmış iştaha, əhval dəyişikliyi və psixotik simptomlar, o cümlədən eşitmə hallusinasiyaları — diqqətə alınmışdır. Analiz göstərib ki, bu xəstələrdə həm immun hüceyrələrinin genləri, həm də neyron siqnal ötürməsində iştirak edən zülalların səviyyəsi dəyişir. DCLK3 və CALY molekulları ilə birlikdə C5 komponentinin səviyyəsi yüksəlib, bu da həm immun, həm də sinir sisteminin həddindən artıq aktivləşməsini göstərir.
Bundan əlavə, qan immun hüceyrələrində sistemli iltihab əlamətləri aşkar edilib; orqanidlər isə neyron bağlantılarının formalaşmasında gecikmə göstərib. Bu da immun pozğunluqlarının sinir toxumasının inkişafına təsirini təsdiqləyir.
Alimlərin sözlərinə görə, nəticələr depressiya haqqında anlayışımızı dəyişdirir: bu, yalnız beyin pozğunluğu deyil, “immunitet–neyron şəbəkəsi” sisteminin pozulmasıdır. Bu, xüsusilə a-tipik formalar və terapiyaya davamlı xəstələr üçün vacibdir, belə xəstələr ümumi xəstələrin təxminən 40%-ni təşkil edir.
Professor Çinju Xan bildirir: “Biz psixiatriyada dəqiq tibbin yeni modelini təklif edirik. Ümid edirik ki, bu məlumatlar biomarkerlərin tapılmasını və yeni terapevtik yanaşmaların hazırlanmasını sürətləndirəcək.”
