Son illərdə qidalanma vərdişlərində tez hazırlanması və dadlı olması səbəbilə ultra emal olunmuş qidalar (çipslər, qazlı içkilər, hazır şirniyyatlar, kolbasa, fast-food məhsulları və s.) geniş yayılıb. Lakin dietoloqlar bu məhsulların sağlamlıq üçün ciddi risklər daşıdığını bildirirlər.
Bəs, nə üçün bu qidalar sağlamlığımıza pis təsir edir?
– Yüksək şəkər və duz tərkibi: Ultra emal olunmuş məhsulların çoxunda əlavə şəkər, duz və zərərli yağlar var. Bu da obezlik, yüksək təzyiq və ürək-damar xəstəlikləri riskini artırır.
– Aşağı qida dəyəri: Bu qidalar vitamin və minerallardan demək olar ki, məhrumdur. Orqanizm üçün lazımlı olan lif, protein və təbii qida maddələri çatışmır.
– Metabolizmi pozur: Süni dadlandırıcılar, rəngləndiricilər və konservantlar bədəndə hormonal tarazlığa mənfi təsir göstərir.
– Bağırsaq sağlamlığına zərəri: Lif azlığı və kimyəvi maddələrin çoxluğu mikrobiomanı zəiflədir, həzm problemlərinə səbəb olur.
– Asılılıq yaradır: Bu məhsullar beyində xoşbəxtlik hormonlarını qısa müddətdə artırır, lakin davamlı istifadə yeməkdən asılılıq yaradır.
Ultra emal olunmuş qidaları gündəlik menyudan maksimum azaltmaq, əvəzində təbii və az işlənmiş məhsullara üstünlük vermək lazımdır.
Çörək, peçenye, qazlı içkilər və paketlənmiş qəlyanaltıları meyvə, tərəvəz, qoz-fındıq, təbii qatıq və ev yeməkləri ilə əvəzləmək ən sağlam seçimdir.
Ultra emal olunmuş qidalar rahat və dadlı görünsə də, onların tez-tez istehlakı uzunmüddətli sağlamlıq problemlərinə yol aça bilər. Mütəxəssislər balanslı, təbii və mövsümi məhsullarla qidalanmanı tövsiyə edirlər.
