Qida mütəxəssisləri göbələklərin saxlanma üsullarına diqqət yetirməyi tövsiyə edirlər. Foodinfo.az xəbər verir ki, şef-aşpaz Alyona Komar ağ göbələklərin çiy halda dondurulmasının düzgün olmadığını bildirib. Onun sözlərinə görə, belə halda məhsul suyu çox buraxır və həm dadını, həm də ətirini itirir.

Mütəxəssis qeyd edib ki, dondurmadan əvvəl göbələkləri 5-7 dəqiqə bişirmək kifayətdir. Bu zaman onlar həm elastikliyini qoruyur, həm də saxlanma zamanı keyfiyyətini itirmir. “Bişdikdən sonra mütləq süzgəcdən keçirib tam soyutmaq lazımdır,” – deyə Komar əlavə edib.

Aşpazın fikrincə, göbələkləri azca qızartmaq da alternativ üsul kimi istifadə oluna bilər. Bu halda da onların dadı və qoxusu qorunur.

Komar bildirib ki, dondurulmuş ağ göbələklərdən müxtəlif yeməklərdə istifadə etmək mümkündür. Onlar şorbalara, qovrulmuş ətə, makaron souslarına, qarabaşağa, pelmen və ev üsulu əriştəyə xüsusi ləzzət qatır.

Mütəxəssis tövsiyə edib ki, məhsulun təbii dadını qorumaq üçün həmişə düzgün hazırlıq mərhələsinə riayət edilməlidir.