Qəhvə istehlakının dəmir və kalsiumun sorulmasına təsiri ilə bağlı mütəxəssislərin açıqlamaları diqqət çəkib. Qəhvə müəyyən hallarda bu iki vacib mineralın bədən tərəfindən mənimsənilməsini zəiflədə bilər.

Foodinfo.az xəbər verir ki, qəhvə xüsusilə bitki mənşəli dəmirin (qeyri-hem dəmir) udulmasına mane ola bilər. Bu səbəbdən ispanaq, mərcimək, paxla və küncüt kimi dəmirlə zəngin qidalar qəhvə ilə birlikdə qəbul edildikdə dəmir daha zəif sorulur. Lakin ətdən alınan dəmirin (hem dəmir) qəhvədən nisbətən az təsirləndiyi bildirilir.

Dəmirlə zəngin yeməkdən ən az 1 saat əvvəl və ya 1–2 saat sonra qəhvə içmək daha məqsədəuyğundur.

Kalsiumla bağlı isə bildirilir ki, qəhvə sidiklə kalsium ifrazını bir qədər artıra bilər. Bu təsir güclü qəhvəni çox miqdarda içən insanlarda daha aydın görünə bilər. Lakin normal kalsium qəbulu olan şəxslərdə bunun ciddi problem yaratmadığı qeyd edilir.

Bu riski azaltmaq üçün qəhvəni südlə içməyi və gündə 3 fincandan artıq qəhvə qəbul etməmək məsləhət görülür.

Qəhvə dəmirin udulmasına daha çox, kalsiuma isə nisbətən az təsir göstərir və vaxtlamaya diqqət etməklə mənfi təsiri minimuma endirmək mümkündür.