Kivi yalnız ləzzətli deyil, həm də sağlamlıq üçün çoxsaylı faydalar təqdim edən meyvədir. Foodinfo.az Rusiya mətbuatına istinadla xəbər verir ki, qastroenteroloq Lyudmila Suxorukova kivi istehlakının ürək-damar sağlamlığını və immuniteti necə gücləndirdiyini izah edib.

Mütəxəssis bildirir ki, kivi zəngin antioksidant mənbəyidir və sərbəst radikallarla mübarizə apararaq hüceyrələrə zərərin və ateroskleroz riskinin azalmasına kömək edir. Tərkibindəki kalium isə qan təzyiqini normallaşdırır, hipertoniya və onunla əlaqəli ürək xəstəlikləri riskini azaldır. Kivi C vitamini ilə də liderdir, bu vitamin immun sistemini stimullaşdıraraq bədənə infeksiyalara qarşı müqavimət yaradır.

Kivinin unikal fermenti aktinidin zülalların parçalanmasına kömək edərək həzmi yaxşılaşdırır və şişkinliyin qarşısını alır. Meyvənin lifləri bağırsağın fəaliyyətini optimallaşdırır, qəbizliyi azaldır və hətta kolon xərçəngi riskini minimuma endirir. Lif eyni zamanda şəkərin qan dövranına daha yavaş daxil olmasına şərait yaradır, buna görə də kivi diabetli insanlar üçün təhlükəsiz və faydalıdır.

Kivinin tərkibindəki lutein və zeaksantin gözləri ultrabənövşəyi şüalardan qoruyur və yaşa bağlı makulyar degenerasiya və katarakt riskini azaldır. Həmçinin, yatmazdan əvvəl kivi yemək serotoninin təsiri ilə yuxuya getməyi sürətləndirir və yuxu keyfiyyətini yaxşılaşdırır.

Ekspert tövsiyə edir ki, gündə 1–2 kivi meyvəsi yemək kifayət edir. Onu təzə şəkildə, salatlara, smuziyə, yoqurt və desertlərə əlavə etmək, hətta sousların hazırlanmasında istifadə etmək mümkündür. Bu, sağlamlıq üçün əhəmiyyətli fayda təmin edir.