Son illərdə kombuça içkisi sağlam həyat tərzi tərəfdarları arasında çox məşhurlaşıb. Bir çoxları bu içkinin həm orqanizmi “təmizlədiyini”, həm də arıqlamağa kömək etdiyini düşünür. Foodinfo.az xəbər verir ki, Rusiya Texnologiya Universitetinin (RTU MIREA) A.N. Reformatski adına Qeyri-üzvi kimya kafedrasının dosenti, kimyaçı Andrey Doroxov “Gazeta.ru”ya açıqlamasında bu inancların heç də tam doğru olmadığını deyib.

Mütəxəssisin sözlərinə görə, kombuçanın orqanizmi toksinlərdən təmizlədiyi barədə deyilənlər elmi əsaslara söykənmir. “Detoks” anlayışını o, sırf marketinq hiyləsi adlandıraraq bildirib ki, sağlam insan orqanizminin artıq özünün ideal təmizlənmə sistemi var – qaraciyər və böyrəklər.

Doroxov vurğulayıb ki, arıqlama ilə bağlı müşahidə edilən təsir də birbaşa kombuçanın möcüzəvi xüsusiyyətlərindən deyil, onun adi qazlı, şəkərli içkilərin əvəzinə qəbul edilməsindən irəli gəlir. Yəni yüksək kalorili şirin içkilərin yerinə daha az kalorili, turş dadlı kombuça içildikdə kalori qəbulu azalır və bu da dolayı yolla çəki itkisində rol oynaya bilər.

Ekspert açıq şəkildə bildirib: “Burada nə birbaşa yağ yandırma, nə də metabolizmin sehrli şəkildə sürətlənməsi baş verir”.