Həyat tərzində kiçik dəyişikliklər bioloji yaşlanmanı ləngidə bilər və sağlamlığın qorunmasına kömək edir. Foodinfo.az xəbər verir ki, son araşdırmalar göstərir ki, uzunömürlülük üçün bahalı metodlar və xüsusi əlavələrdən daha çox, sadə və əlçatan vərdişlər təsirli olur. Mütəxəssislər qeyd edirlər ki, həftədə yalnız iki-üç saat idmanla məşğul olmaq bədəni təxminən iki il “gəncləşdirə” bilər.

Hətta 20 dəqiqəlik qısa məşqlərlə belə başlanğıc etmək mümkündür. Sağlam yuxu da yaşlanmanı ləngitməkdə vacib rol oynayır: gündə beş saatdan az yatmaq, xüsusilə 50 yaşdan sonra, şəkər xəstəliyi, demensiya və digər xəstəlik riskini 30% artırır. Həkimlərin tövsiyəsinə görə, yetkinlər gündə yeddi-doxuz saat yuxu almalıdırlar. Düzgün qidalanma da bioloji yaşın azalmasına kömək edir: işlənmiş qidaları kənara qoyaraq meyvə, tərəvəz və tam taxıllı məhsullara üstünlük vermək yaşlanmanı 2,5 il gecikdirə bilər.

Beyin məşqləri, məsələn, yeni dillər öyrənmək də yaşlanmanı ləngidən vərdişlərdəndir; çoxdillilik beynin funksiyasını qoruyur və zehni gənc saxlayır. Stresin azaldılması və zərərli vərdişlərdən uzaq durmaq da vacibdir: siqaret ağciyərləri təxminən beş il qabaqcadan qocaldır, spirt isə hüceyrələrin yaşlanmasını sürətləndirir. Stresslə düzgün davranma bacarığı isə ümumi gəncliyi qorumağa yardım edir.

Ən əsas məqam budur ki, bütün bu metodlar hər kəs üçün əlçatandır və böyük maliyyə xərcləri tələb etmir. Sadə başlanğıc üçün hər gün bir az hərəkət etmək, yuxu rejimini nizamlamq və zərərli məhsulları azaltmaq kifayətdir. Hətta kiçik dəyişikliklər belə orqanizmə müsbət təsir göstərir və uzunmüddətli sağlamlığın təminatına xidmət edir. Beləliklə, hər bir insan öz həyat tərzində bu beş vərdişi tətbiq etməklə həm fiziki, həm də zehni sağlamlığını qoruyaraq yaşlanmanı ləngidə bilər.