Kalori qəbulunun azaldılması təkcə çəki itirilməsinə deyil, eyni zamanda beyin fəaliyyəti və bağırsaq sağlamlığına da ciddi təsir edir. Düzgün və nəzarətli kalori məhdudiyyəti orqanizmdə bir sıra müsbət dəyişikliklərə səbəb ola bilər.

Foodinfo.az xəbər verir ki, kalori məhdudiyyəti beyində iltihabi prosesləri azalda, yaddaş və diqqət funksiyalarını yaxşılaşdıra bilər. Alimlər bunu beyində hüceyrə yenilənməsinin sürətlənməsi və oksidativ stressin azalması ilə əlaqələndirirlər.

Eyni zamanda, az kalorili qidalanmanın bağırsaq mikroflorasına da təsir etdiyi müəyyən edilib. Kalori qəbulunun azalması faydalı bakteriyaların artmasına, həzm prosesinin yaxşılaşmasına və immun sisteminin güclənməsinə şərait yaradır.

Lakin mütəxəssislər xəbərdarlıq edirlər ki, kalori məhdudiyyəti həddindən artıq və nəzarətsiz şəkildə tətbiq olunduqda əks təsir göstərə bilər. Uzunmüddətli aclıq beyin yorğunluğuna, bağırsaq problemlərinə və ümumi enerji çatışmazlığına səbəb ola bilər.

Sağlam nəticə əldə etmək üçün kalori məhdudiyyətinin həkim və ya dietoloq nəzarəti altında, balanslı şəkildə aparılması tövsiyə edilir.