Soyuq qış axşamları bir çox insan üçün isti içki – isti şokoladla assosiasiya olunur. Foodinfo.az Sports.kz-ya istinadla xəbər verir ki, terapevt İvan Yeremenko bu içkinin sağlamlıq üçün faydaları və riskləri barədə danışıb.

Mütəxəssisin sözlərinə görə, təbii kakao tozu əsasında hazırlanmış isti şokolad flavonoidlər, maqnezium və teobromin ilə zəngindir. Bu maddələr ürək-damar sistemi və əhval-ruhiyyə üçün müsbət təsir göstərə bilər.

Lakin Yeremenko qeyd edib ki, hazır sənaye qarışıqları və içkilərin əksəriyyəti çoxlu şəkər və doymuş yağlar ehtiva edir. Onun sözlərinə görə, bu məhsulların müntəzəm qəbulu kaloriyaların artmasına, qan şəkərinin dalğalanmasına və pankreasın əlavə yüklənməsinə səbəb ola bilər.

Terapevt xüsusilə vurğulayıb ki, insulin müqaviməti və şəkərli diabeti olan insanlarda isti şokolad metabolik nəzarətin pozulmasına gətirib çıxara bilər. Teobrominin stimullaşdırıcı təsiri də diqqətdə saxlanmalıdır: həddindən artıq qəbul ürək döyüntüsünün artmasına, narahatlıq və yuxu pozğunluqlarına səbəb ola bilər.

Həmçinin, mədə xorası, qastroezofageal refluks və yüksək turşuluğu olan şəxslərdə kakao mədədə narahatlıq yarada bilər. Yeremenko bildirib ki, belə hallarda isti şokoladın istehlakı ölçülü və ehtiyatla olmalıdır.