Artıq çəki olmasa belə, bir çox insanda qarın nahiyəsi çıxıntılı görünə bilər. Mütəxəssislərin fikrincə, bunun əsas səbəbi yağlanma deyil, düzgün olmayan duruş və orqanizmdə yaranan şişkinlikdir. Foodinfo.az Life.ru saytına istinadla xəbər verir ki, fitnes-məşqçi Alena Averyanova bildirib ki, çıxıntılı qarın çox vaxt kürəyin zəifləməsi və bədənin önə əyilməsi ilə bağlı olur.

Məşqçinin sözlərinə görə, ən çox rast gəlinən problem qamətin pozulmasıdır. Kürək əzələləri zəif olduqda onurğa sütunu düzgün saxlanılmır, sinə əzələləri qısalır və çiyinlər önə doğru əyilir. Bu vəziyyət təkcə görünüşü korlamır, eyni zamanda qan dövranını pozur və şişkinliyə səbəb olur.

Alena Averyanova qeyd edib ki, kürək və bədən mərkəzi əzələlərinin möhkəmləndirilməsi nəticəsində qarın daha yığcam görünə bilər. Bu dəyişiklik ən azı qamətin düzəlməsi hesabına əldə olunur. O vurğulayıb ki, düzgün seçilmiş hərəkətlər həm duruşu yaxşılaşdırır, həm də vizual olaraq qarın nahiyəsini kiçildir.

Məşqçi qamət və əzələ tonusu üçün beş təsirli hərəkət tövsiyə edib. İlk hərəkət planqadır. Bu hərəkət bədən mərkəzini möhkəmləndirir və bədəni düz xətt üzrə saxlamağı tələb edir. Başlanğıc üçün 30 saniyə kifayət edir.

İkinci hərəkət omba körpüsüdür. Arxası üstə uzanaraq dabanlardan güc alıb çanağı yuxarı qaldırmaq omba və budun arxa hissəsini gücləndirir. Bu hərəkət aşağı bədən üçün xüsusilə faydalı sayılır.

Üçüncü hərəkət yerində qaçışdır. İp ilə və ya ipsiz icra oluna bilər. Bu hərəkət limfa axınını sürətləndirir, şişkinliyi azaldır və ümumi bədən tonusunu yüksəldir.

Dördüncü hərəkət “qayıq” adlanan hərəkətdir. Üzüüstə uzanaraq eyni anda sinəni və ayaqları yerdən qaldırmaq kürək əzələlərini möhkəmləndirir. Bu vəziyyətdə 10–13 saniyə qalmaq tövsiyə olunur.

Beşinci hərəkət isə bütün bədəni işə salan intensiv hərəkət olan berpidir. Məşqçi bu hərəkətə 8–10 təkrarla başlamağı məsləhət görür.

Alena Averyanova bildirib ki, bu hərəkətlərin müntəzəm icrası təkcə qaməti düzəltmir, həm də limfa axınını aktivləşdirərək ümumi şişkinliyi azaldır. O, xüsusilə ev şəraitində məşq edərkən hərəkətlərin düzgün texnika ilə yerinə yetirilməsinin vacibliyini vurğulayıb və hər hansı narahatlıq yaranarsa, mütəxəssisə müraciət etməyi tövsiyə edib.