Sağlam qidalanmaq üçün mütləq az yemək və ya ciddi pəhriz saxlamaq lazım deyil. Düzgün qida seçimi və balanslı menyu həm çəki artımının qarşısını alır, həm də orqanizmi lazımi vitamin və minerallarla təmin edir.

Foodinfo.az xəbər verir ki, əsas problem çox yemək deyil, “boş kalori” adlandırılan qidalara üstünlük verilməsidir. Şirniyyatlar, ağ undan hazırlanan məmulatlar və qazlı içkilər yüksək kalori versə də, uzunmüddətli toxluq yaratmır və çəki artımına səbəb olur.

Sağlam çəkini qorumaq üçün boşqabın yarısını tərəvəzlər təşkil etməlidir. Digər hissə isə protein və kompleks karbohidrat arasında bölünməlidir. Toyuq, balıq, yumurta, mərci və qatıq kimi protein mənbələri əzələ kütləsini qoruyur və uzun müddət toxluq hissi yaradır. Qarabaşaq, bulqur və qəhvəyi düyü isə qan şəkərini sabit saxlayır.

Uzun müddət ac qalmaq axşam saatlarında həddindən artıq qidalanmaya səbəb ola bilər. Bu səbəbdən gün ərzində 3–4 saatdan bir yüngül və balanslı ara yemək tövsiyə olunur. Meyvə ilə qoz-fındıq, qatıq və ya az miqdarda quru meyvə uyğun seçim hesab edilir.

Şirniyyata tez-tez meyl bəzən qan şəkərinin dalğalanması və ya dəmir çatışmazlığı ilə əlaqəli ola bilər. Bu hallarda qidalanma rejiminin düzəldilməsi vacibdir.

Qızartma üsulu yerinə qaynatma, buğda bişirmə və sobada hazırlanmış yeməklərə üstünlük verilməsi həm kalorini azaldır, həm də həzmi asanlaşdırır.

Davamlı və balanslı qidalanma qısa müddətli sərt pəhrizlərdən daha effektivdir. Doğru planlaşdırılmış menyu həm çəkiyə nəzarət etməyə, həm də gün boyu enerjili qalmağa kömək edir.