Tərəvəzlər vitamin və minerallarla zəngin olsa da, onların bişirilməsi və ya çiy yeyilməsi qidalanmada fərqli nəticələr doğura bilər. Foodinfo.az xəbər verir ki, bəzi tərəvəzlər bişirilərkən qida maddələrini itirir, digərləri isə əksinə, daha faydalı hala gəlir.

Almaniyalı qidalanma mütəxəssisi Dr. Anja Wagner “Deutsche Welle”yə açıqlamasında deyib ki, pomidor bişirildikdə antioksidant olan likopenin miqdarı artır, amma C vitamini azalır: “Bu səbəbdən pəhrizdə həm bişmiş, həm də çiy tərəvəzlərə yer vermək lazımdır”.

Tədqiqatlar göstərir ki, brokkoli və ispanaq kimi tərəvəzlər bişirildikdə fol turşusu və C vitamini itkisinə məruz qalır. Əksinə, yerkökü bişirildikdə beta-karotin orqanizm tərəfindən daha yaxşı mənimsənilir.

Mütəxəssislər balanslı rasion üçün tərəvəzlərin müxtəlif şəkildə — buxarda, sobada və ya çiy halda qəbulunu tövsiyə edirlər. Beləcə, orqanizm həm vitamin itkisini minimuma endirir, həm də faydalı maddələrdən maksimum yararlanır.