Çoxları çayı zərərsiz hesab etsə də, onun həddindən artıq qəbulu orqanizm üçün ciddi fəsadlar yarada bilər. Foodinfo.az xəbər verir ki, endokrinoloq Yuliya Vereina çayın çox içilməsinin sağlamlığa mənfi təsir göstərə biləcəyini bildirib. Onun sözlərinə görə, bu içkidə olan tanin adlı maddə mədə və bağırsaqların normal fəaliyyətini poza, həddindən artıq kofein isə əsəb sistemini yükləyərək əsəbilik və gərginlik hissini artıra bilər. Həkim qeyd edib ki, çay bəzi vitamin komplekslərinin təsirini azalda və orqanizmin dəmiri mənimsəməsini çətinləşdirə bilər. Vereinanın sözlərinə görə, bu vəziyyət xüsusilə qanazlığı və ya dəmir çatışmazlığı riski olan insanlar üçün təhlükəlidir. O əlavə edib ki, çayın təsiri altında bəzi antidepresantların effekti güclənə bilər ki, bu da yuxusuzluq və sinir sistemində həddindən artıq oyanıqlıqla nəticələnə bilər.

Digər tərəfdən, Rusiya Səhiyyə Nazirliyinin Krasnoqorsk xəstəxanasının həkim-qastroenteroloqu Yelena Pexotina bildirib ki, çox bərk dəmlənmiş çay süd məhsullarındakı kalsiumun mənimsənilməsini zəiflədə bilər. Onun sözlərinə görə, balanslı qidalanan sağlam insanlar üçün bu, ciddi fəsad yaratmasa da, sümükləri zəif olan, osteoporoz və ya anemiya riski daşıyan şəxslər üçün problemə çevrilə bilər. Pexotina məsləhət görür ki, süd məhsulları ilə çayın qəbulu arasında ən azı 30–40 dəqiqə fasilə saxlanılsın. O vurğulayıb ki, bu qaydaya əməl etməklə orqanizm həm dəmir, həm də kalsium kimi vacib maddələri daha yaxşı mənimsəyə bilər.

Mütəxəssislər ümumi nəticə kimi bildirirlər ki, çay faydalı içki olsa da, onun miqdarına nəzarət etmək vacibdir. Gündəlik qəbulu məhdudlaşdırmaq, xüsusilə də bərk dəmlənmiş çayı az içmək orqanizmi əlavə risklərdən qoruyar və qidalanmadan maksimum fayda əldə etməyə kömək edər.