Hazır yeməkləri soyuducuda saxlamaq həm vaxta, həm də büdcəyə qənaət etsə də, onların düzgün müddətdə istifadə olunmaması sağlamlıq üçün risk yarada bilər. Mütəxəssislər bildirirlər ki, hər qida növünün öz saxlanma limiti var və bu qaydalara əməl etmək vacibdir. Foodinfo.az BB.LV saytına istinadla xəbər verir ki, infeksionist həkim hazır yeməklərin təhlükəsiz saxlanma müddətləri ilə bağlı tövsiyələr verib.

Aşağı riskli məhsullara meyvə və tərəvəzlər daxildir – doğranmış halda onlar adətən 3–5 gün təzə qalır. Bişmiş tərəvəzlər 3–7 gün, paxlalılar isə 10 günədək saxlanıla bilər. Çörək otaq temperaturunda bir neçə gün, soyuducuda isə bir qədər daha uzun müddət qala bilər, lakin bu, onun dadına təsir edə bilər.

Orta riskli qidalar arasında makaron və müxtəlif sıyıqlar 3 günədək, ət və ya balıqla hazırlanan şorbalar və yeməklər isə 4–5 günədək saxlanıla bilər. Desertlər adətən 2–3 gün ərzində istehlak olunmalıdır, kremli şirniyyatlar isə daha tez – 1–2 günə yeyilməlidir.

Yüksək riskli məhsullara gəldikdə isə, bişmiş ət və quş əti 3–4 gün ərzində təhlükəsiz sayılır, lakin paştetlər cəmi 1–2 gün saxlanmalıdır. Yumurta və toyuq salatları da 1–2 gün ərzində yeyilməlidir. Dəniz məhsulları və balıq isə maksimum 2–3 gün saxlanmalıdır, çünki tez xarab ola bilər.

Mütəxəssislər əlavə edir ki, restoran və kafelərdən alınan hazır yeməklər üçün ən təhlükəsiz qayda onları 24 saat ərzində istehlak etməkdir. Bu qaydalara əməl etməklə həm qida israfının qarşısını almaq, həm də sağlamlığı qorumaq mümkündür.