Soyuqdəymə və qripin ilkin əlamətləri zamanı edilən bəzi səhvlər xəstəliyi yüngülləşdirmək əvəzinə onu ağırlaşdıra bilər. Foodinfo.az URA.ru saytına istinadla xəbər verir ki, terapevt Andrey Zvonkov soyuqdəymə ilə mübarizədə insanların ən çox yol verdiyi beş əsas səhvi sadalayıb.

Həkimin sözlərinə görə, birinci və ən yayılmış yanlışlıq — hər bir tənəffüs yolu infeksiyasını virus mənşəli saymaqdır. Halbuki, halların yarıdan çoxu mikrob mənşəlidir. Əgər səhər burundan yaşıl ifrazatlar gəlir və burun seliyi şişkin qalırsa, bu, bakterial infeksiyanın əlamətidir.

İkinci səhv — burun axıntısının düzgün müalicə olunmamasıdır. Zvonkov qeyd edir ki, damarları daraldan burun damcıları xəstəliyi müalicə etmir, sadəcə selikli qişanı qurudur. Bu halda burnu xlorheksidin və ya miramistin kimi antiseptiklərlə yumaq, həmçinin streptosid istifadə etmək tövsiyə olunur.

Üçüncü səhv — öskürəyə qarşı yanlış vasitələr seçməkdir. Mütəxəssis xəbərdarlıq edir ki, quru öskürək zamanı bəlğəmgətirici dərmanlardan istifadə “odun üstünə benzin tökmək” kimidir. Belə hallarda bəlğəmgətirici deyil, öskürəyi kəsən vasitələrdən istifadə edilməlidir, bəlğəm əmələ gələndə isə əksinə, bəlğəmgətiricilər qəbul olunmalıdır.

Dördüncü səhv — qızdırmanı tez salmaq cəhdidir. Həkim bildirir ki, 38–38,5°C temperatur viruslar üçün zərərli hesab olunur və bu zaman bədən infeksiya ilə mübarizə aparır. Buna görə 37,5°C temperaturda dərhal hərarətsalıcı içmək düzgün deyil.

Beşinci və son səhv — xalq təbabəti üsullarına həddən artıq etibar etməkdir. Zvonkov xəbərdarlıq edir ki, hamam, araqla bal içmək və vitaminləri normadan artıq qəbul etmək vəziyyəti ağırlaşdıra bilər. Alkoqol immun sistemi zəiflədir, hamam isə bakteriyaların çoxalması üçün əlverişli şərait yaradır, bal isə boğaz seliyini qıcıqlandıra bilər.

Mütəxəssis vurğulayıb ki, əgər burun axıntısı rəng dəyişirsə, bəlğəm irinli hala gəlirsə və ya öskürək uzun sürürsə, həkimə müraciət etmək vacibdir. Özbaşına müalicə və “internet məsləhətləri” təhlükəli nəticələrə gətirə bilər.