Səhər yeməyi uzun illərdir "günün ən vacib qidası" hesab olunur. Bununla belə, son illərdə arıqlamaq istəyən bəzi insanlar səhər yeməyindən imtina etməyə başlayıblar. Onlar hesab edirlər ki, günün ilk qidasını qəbul etməmək ümumi kalori miqdarını azaldır və çəki itirməyə kömək edir. Bəs bu yanaşma həqiqətən effektivdirmi?

Foodinfo.az xarici mətbuata istinadla xəbər verir ki, qidalanma üzrə aparılan araşdırmaların nəticələri birmənalı deyil. Bəzi tədqiqatlar göstərir ki, səhər yeməyini buraxan şəxslər gün ərzində daha az kalori qəbul edə bilirlər. Digər araşdırmalar isə bunun əksini göstərərək qeyd edir ki, səhər yeməyi yeməyən insanlar günün sonrakı saatlarında daha çox acır və yüksək kalorili qidalara üstünlük verirlər.

Qidalanma üzrə mütəxəssis Loren Manaker bildirir ki, səhər yeməyinin təsiri insanın həyat tərzindən və qidalanma vərdişlərindən asılıdır. Onun sözlərinə görə, protein və liflə zəngin səhər yeməyi qəbul edən insanlar gün ərzində özlərini daha tox hiss edir və qəlyanaltılara daha az ehtiyac duyurlar. Əksinə, şəkərli və yüksək kalorili səhər yeməkləri qısa müddət sonra yenidən aclıq hissi yarada bilər.

Mütəxəssislər vurğulayırlar ki, arıqlama prosesində əsas amil gün ərzində qəbul edilən və sərf olunan enerjinin balansıdır. Təkcə səhər yeməyini buraxmaq çəki azalmasının zəmanəti hesab edilmir. Əgər insan gün ərzində sağlam və balanslı qidalanırsa, səhər yeməyinin vaxtı və ya olub-olmaması fərdi xüsusiyyətlərə görə dəyişə bilər. Buna görə də qidalanma planı hazırlayarkən ümumi həyat tərzi, fiziki aktivlik və sağlamlıq vəziyyəti nəzərə alınmalıdır.