Qurudulmuş meyvələrin təzə meyvələrə nisbətən daha şirin və az faydalı olması barədə geniş yayılmış fikir mövcuddur. Foodinfo.az BB.LV-yə istinadla xəbər verir ki, bu yanaşma qara gavalı qurusuna aid deyil. Qastroenteroloq İlya Nevzorovun sözlərinə görə, məhz qara gavalı qurusu bir sıra sağlamlıq problemlərinin həllinə kömək edə və ciddi xəstəliklərin qarşısını ala bilər.
Mütəxəssis bildirib ki, təzə gavalının müntəzəm istifadəsi belə eyni effekti vermir. Qara gavalı qurusu tərkibindəki yüksək qida dəyərinə görə seçilir və orqanizm üçün son dərəcə faydalı hesab olunur. Onun tərkibində B qrupu vitaminləri, A, E və K vitaminləri, nikotin turşusu, həmçinin kalium, dəmir, fosfor, sink, mis, manqan və maqnezium mövcuddur.
Qara gavalı qurusu liflə zəngin olduğu üçün bağırsaqların normal fəaliyyətinə müsbət təsir göstərir. Mütəxəssislərin fikrincə, bu məhsulu müntəzəm rasionuna daxil edən şəxslərdə həzm prosesi daha stabil olur. Bundan əlavə, tərkibində olan həll olunmayan lif və sorbit sayəsində qara gavalı qurusu təbii işlədici təsirə malikdir. Bu səbəbdən onun təbii halda, kompot və ya ev şirniyyatlarının tərkibində istifadəsi qəbizliyin qarşısının alınmasına kömək edir.
Sağlamlıq üçün faydaları
Araşdırmalar göstərir ki, qara gavalı qurusunu müntəzəm istehlak edən insanlarda sümük möhkəmliyi artır və yıxılma, zərbə zamanı sınıq riski azalır. Kanadalı alimlərin nəticələrinə görə, bu effekti görmək üçün qara gavalı qurusunu azı üç ay ərzində hər gün yemək lazımdır.
Həkimin sözlərinə görə, qara gavalı qurusunun tərkibində olan polifenollar güclü təbii antioksidantlardır. Bu maddələr ürək-damar xəstəliklərinin və bəzi xərçəng növlərinin qarşısının alınmasında mühüm rol oynayır. Antioksidantlar eyni zamanda orqanizmdə qocalma prosesini ləngidir və hüceyrələri qoruyur.
Zərərləri və məhdudiyyətlər
Bütün faydalarına baxmayaraq, qara gavalı qurusu həddindən artıq istehlak edildikdə sağlamlıq problemlərinə səbəb ola bilər. Mütəxəssislər bildirirlər ki, normadan artıq istifadə ishal, qarında köp və ürəkbulanma yarada bilər. Həmçinin pediatrlar uşaqlara qara gavalı qurusunun hər gün verilməsini tövsiyə etmirlər, çünki bu məhsul allergik reaksiyalara səbəb ola bilər.
Həkimlərin fikrincə, qara gavalı qurusu düzgün miqdarda və ölçülü şəkildə istifadə edildikdə həm həzm sistemi, həm də ümumi sağlamlıq üçün dəyərli təbii qida hesab olunur.
