Gündəlik kofe qəbulunun gözlənilməz sağlamlıq üstünlükləri hansılardır?  Foodinfo.az NEWS.ru-ya istinadla xəbər verir ki, Çin alimləri kofenin müntəzəm istifadəsinin qaraciyər və böyrəkləri qorumaqda faydalı olduğunu sübut ediblər. Tədqiqat nəticələrinə görə, bu təsir kofeinlə bağlı deyil, kofedəki bioloji aktiv metabolitlərin fəaliyyəti ilə izah olunur.

Alimlər qeyd ediblər ki, kofe tərkibində olan xlorogen turşuları və diterpenlər bağırsaq mikroflorası tərəfindən parçalanaraq qan dövranına daxil olur və qaraciyər, böyrəklər üçün antiinflamatuar və antioksidant təsir göstərir. Bu metabolitlər ciddi xəstəliklərin, məsələn, sirroz, hepatosellulyar karsinoma, alkoqolsuz piyli qaraciyər xəstəliyi və xroniki böyrək xəstəliklərinin riskini azaldır.

Tədqiqat göstərir ki, qoruyucu təsirin gücü bir sıra amillərdən asılıdır: kofenin hazırlanma üsulu aktiv maddələrin miqdarını müəyyən edir, həmçinin fərdi metabolizm və bağırsaq mikroflorasının tərkibi də təsiri gücləndirir.

Beləliklə, alimlər vurğulayırlar ki, gündəlik kofe qəbulu yalnız enerji vermir, həm də qaraciyər və böyrəklərin sağlamlığının qorunmasına yardım edir.