Yod çatışmazlığı bu gün də dünyada ciddi sağlamlıq problemi olaraq qalır. Foodinfo.az xəbər verir ki, Moskva vilayətinin Səhiyyə Nazirliyinə tabe olan Vidnoye xəstəxanasının terapevti Zarema Ten bildirib ki, yodun azlığı xüsusilə hamilə qadınlar və uşaqlar üçün təhlükəlidir.

Həkimin sözlərinə görə, hamilə qadınlarda yod çatışmazlığı dölün inkişafına mənfi təsir göstərir, düşüklərə və doğuş zamanı anadangəlmə qüsurlara səbəb ola bilər. “Yod bədənin normal hormon istehsalı üçün vacibdir. Bu hormonlar həm ana orqanizminin, həm də dölün beyin və sinir sisteminin düzgün formalaşmasında əsas rol oynayır,” – deyə Ten qeyd edib.

O, əlavə edib ki, uşaqlarda yodun azlığı bəzən geri dönməz nəticələr doğurur – həm zehni, həm də fiziki inkişafda ləngimə yaradır. “Ən ağır hallarda bu, zehni geriliklə müşahidə olunan kretinizm adlanan vəziyyətə gətirib çıxara bilər,” – deyə mütəxəssis vurğulayıb.

Ümumdünya Səhiyyə Təşkilatının məlumatına görə, yod çatışmazlığı dünyada zehni geriliyin qarşısı alına bilən əsas səbəblərindən biridir.

Zarema Ten məsləhət görür ki, insanlar gündəlik qidalanmalarında yodlu duza, dəniz məhsullarına, balığa və süd məhsullarına yer versinlər. Onun sözlərinə görə, bu sadə addım həm uşaqların sağlam inkişafını, həm də böyüklərdə qalxanabənzər vəzinin normal fəaliyyətini qorumağa kömək edir.