Yeməklərdə duzun çox istifadəsi yalnız dadı artırmır, həm də ürək və damar sağlamlığı üçün ciddi təhlükə yaradır. Foodinfo.az xəbər verir ki, bu barədə “RIAMO”ya açıqlamasında “SM-Klinika”nın endokrinoloqu və dietoloqu Armine Afonina danışıb.

Onun sözlərinə görə, duzun artıq qəbulu orqanizmdə maye tutulmasını artırır, qan həcmini çoxaldır və arterial təzyiqi yüksəldir. “Bu, nəticə etibarilə ürək əzələsinə əlavə yük yaradır və uzunmüddətli perspektivdə onun tez köhnəlməsinə səbəb olur”, – deyə Afonina bildirib.

Mütəxəssis qeyd edib ki, yüksək təzyiqin əsas səbəblərindən biri də məhz həddindən artıq duz istehlakıdır. Bu vəziyyət hipertoniyanın yaranma riskini artırır, ürəyin daimi gərginlik altında işləməsinə gətirib çıxarır və nəticədə infarkt və insult ehtimalını yüksəldir.

Afonina həmçinin xəbərdarlıq edib ki, orqanizmdə duzun çoxluğu yalnız ürəyə deyil, böyrəklərin fəaliyyətinə də mənfi təsir göstərir. Bu, onların filtrasiyasını çətinləşdirir və osteoporoz kimi sümüklərin zəifləməsi ilə müşayiət olunan xəstəliklərin inkişafına təkan verə bilər.

Digər dietoloq Tatyana Seleznyova isə “aif.ru”ya açıqlamasında əlavə edib ki, çörək və qənnadı məmulatlarının çox qəbulu da sağlamlığa zərərli təsir göstərir. “İnsanların gündəlik rasionunda bu məhsullar onsuz da kifayət qədərdir. Əgər özünüzü şirniyyatla sevindirmək istəyirsinizsə, bunu yalnız bayramlarda və az miqdarda – bir-iki piroqla məhdudlaşdırın”, – deyə Seleznyova bildirib.

Mütəxəssislər vurğulayırlar ki, duz və şəkərin normadan artıq qəbulu təkcə ürək-damar sisteminə deyil, həm də metabolizm, böyrəklər və sümük sağlamlığına mənfi təsir göstərir. Sağlam qalmağın əsas yolu isə duzdan ölçülü şəkildə istifadə etmək və rasionda onun miqdarını daim nəzarətdə saxlamaqdır.