Xəstəliklə mübarizə aparan orqanizmin gücü yalnız dərmanlardan deyil, gündəlik qidalanmadan da asılıdır. Foodinfo.az bildirir ki, qastroenteroloq, “Gemotest” laboratoriyasının ekspert həkimi Yekaterina Kaşuxun sözlərinə görə, immun sisteminin 80 faizə qədəri məhz bağırsaqlarda formalaşır və burada yaranan T-limfositlər, B-limfositlər, makrofaqlar və digər hüceyrələr bədənin viruslara, bakteriyalara və parazitlərə qarşı müdafiəsini təmin edir. O, RT-yə açıqlamasında vurğulayıb ki, sağlam bağırsaq mühitini qorumaq üçün qidalanma müxtəlif və balanslı olmalı, rasionda lif, vitaminlər, minerallar və keyfiyyətli zülallar mütləq yer almalıdır.

Kaşux bildirib ki, xüsusilə xəstəlik dövründə bəzi qidalardan uzaq durmaq çox vacibdir. Trans yağlar, süni əlavələr və konservantlarla zəngin məhsullar immun sisteminin işini zəiflədə, bağırsaq florasının tarazlığını poza və iltihabi prosesləri artıraraq sağalmanı ləngidə bilər. O, qızardılmış, çox ədviyyatlı və həddindən artıq duzlu yeməklərin də bu dövrdə rasiondan çıxarılmasını tövsiyə edir, çünki bu cür qidalar selikli qişaları qıcıqlandıra, qida maddələrinin sorulmasını çətinləşdirə və bədəni əlavə zəhərlənmə riski ilə üz-üzə qoya bilər.

Mütəxəssis əlavə edib ki, tənəffüs yolları infeksiyaları və soyuqdəymə zamanı qida rasionu yüngül, vitaminlərlə (xüsusilə C, A və B qrupu), minerallarla və asan həzm olunan zülallarla zəngin olmalıdır. Belə vəziyyətdə ən yaxşı seçim sadə və təbii tərkibli yeməklərdir – buxarda və ya suda bişirilmiş az yağlı ət və balıq, yerkökü və kələm kimi tərəvəzlər, yüngül yarmalar, həmçinin fermentləşdirilmiş süd məhsulları və kəsmik kimi qidalar.

Kaşux xüsusilə toyuq bulyonunun faydasını vurğulayıb. Onun sözlərinə görə, bulyon bədəni nəmləndirir, asanlıqla mənimsənilir və orqanizmin bərpası üçün zəruri olan amin turşuları, vitaminlər və minerallarla zəngindir. Bu isə xəstəliyin daha yüngül keçməsinə və sağalma prosesinin sürətlənməsinə kömək edir.

Mütəxəssis yekun olaraq bildirib ki, düzgün qidalanma xəstəliyin gedişatına ciddi təsir göstərir və immun sisteminin güclənməsində əsas rol oynayır. Buna görə də, xəstəlik zamanı qida seçiminə diqqət etmək və bağırsaq sağlamlığını qorumaq, bərpanı sürətləndirməyin ən sadə və effektiv yollarından biridir.