Ürək sağlamlığının qorunması üçün gündəlik qidalanma böyük əhəmiyyət daşıyır və düzgün seçimlər uzunömürlü həyatın əsas şərtlərindən sayılır. Həkimlər bildirirlər ki, bəzi qida qrupları ürək-damar sisteminə xüsusi müsbət təsir göstərir. Foodinfo.az Lenta.ru saytına istinadla xəbər verir ki, ürək həkimi Nataliya Solovyova ürəyin sağlam qalması üçün vacib olan dörd əsas qida kateqoriyasını sadalayıb.

Mütəxəssis ilk növbədə tərəvəz və göyərtilərin əhəmiyyətini vurğulayıb. Onun sözlərinə görə, kahı, cəfəri, şüyüd, ispanaq, quzuqulağı, brokoli, gül kələmi, balqabaq və qabağın müntəzəm istifadəsi qan təzyiqinin tənzimlənməsinə kömək edir və orqanizmdə iltihabi proseslərin azalmasına şərait yaradır. İkinci vacib qrup kimi soyuq dəniz balıqları göstərilir. Skumbriya, qızılbalıq, sardina və siyənək kimi balıqlar faydalı yağ turşuları ilə zəngindir və ürək fəaliyyətini dəstəkləyir. Bitki mənşəli yağ mənbələri arasında isə avokado və zeytun yağı xüsusilə tövsiyə olunur.

Həkim əlavə edib ki, tam taxıllı dənli bitkilər və paxlalılar da menyuda mütləq yer almalıdır. Bu qidalar liflə zəngindir və zərərli yağ maddələrinin orqanizmdən xaric olunmasına kömək edir. Bundan başqa, giləmeyvə və müxtəlif meyvələr damarların elastikliyini qoruyur, qan təzyiqinin sabit qalmasına dəstək verir. Mütəxəssis vurğulayıb ki, düzgün və balanslı qidalanma ürək xəstəliklərinin qarşısının alınmasında ən güclü vasitələrdən biridir və hər bir insan gündəlik menyusuna bu məhsulları daxil etməklə sağlamlığını möhkəmləndirə bilər.