Meyvə və tərəvəzləri yeməzdən əvvəl yumaq artıq hamı üçün adi qaydaya çevrilib. Lakin qoz-fındıq məhsullarının yuyulması məsələsi bir çox insan üçün sual olaraq qalır.
Foodinfo.az BB.LV saytına istinadla xəbər verir ki, toksikoloq və tibb üzrə fəlsəfə doktoru Mixail Kutuşovun sözlərinə görə, qoz-fındığı yeməzdən əvvəl yumaq məsləhətdir. O bildirir ki, məhsullar daşınma və satış zamanı tozlanır, müxtəlif səthlərlə təmasda olur və insanlar tərəfindən dəfələrlə toxunulur. Buna görə də həm qabıqlı, həm də qabığı təmizlənmiş qoz-fındığı istehlakdan əvvəl təmizləmək daha təhlükəsiz sayılır.
Mütəxəssis qeyd edir ki, qabığı təmizlənmiş qoz-fındığı sərin suda 6–12 saat islatmaq yaxşı üsuldur. Bu, səthdəki çirkləri aradan qaldırmaqla yanaşı, orqanizmdə mineralların mənimsənilməsinə mane ola bilən fitin turşusunun bir hissəsini də azaldır. Qabıqlı qoz-fındıq isə çox çirkli olduqda sabun və fırça ilə yuyula bilər, təmizlənmiş məhsulları isə sadəcə axar suda yaxalamaq kifayətdir.
Həkimin sözlərinə görə, qoz-fındığın səthində müxtəlif bakteriyalar və zərərli mikroorqanizmlər ola bilər. Xüsusilə immun sistemi zəif olan insanlarda bu mikroblar sağlamlıq problemlərinə səbəb ola bilər. Buna görə mütəxəssislər yalnız meyvə və tərəvəzləri deyil, qoz-fındıq və toxumları da istehlakdan əvvəl yumağı tövsiyə edirlər.
