Bütün pendir növlərində görünən kif təhlükəli deyil. Foodinfo.az Sports.kz-a istinadla xəbər verir ki, bərk pendirlər — məsələn, çeddar, parmezan və İsveçrə pendiri — üzərində kif yaranarsa, həmin hissədən ən azı iki yarım santimetr dərinlikdə kəsildikdə bu pendiri yemək təhlükəsiz sayılır. Əsas odur ki, bıçaq kifə toxunmasın.

Kolorado Dövlət Universitetinin biotibbi mühəndislik və ictimai sağlamlıq fakültəsinin professoru Bred Raysfeldin sözlərinə görə, bu qayda yalnız bərk pendirlərə aiddir. Yumşaq pendirlər — rikotta, kəsmik və qaymaqlı pendir kimi növlər — kiflənəndə dərhal atılmalıdır, çünki kif nəmli mühitdə çox sürətlə yayılır.

Alim əlavə edib ki, bəzi pendir növlərində “təhlükəsiz” kifdən istehsal zamanı məqsədli şəkildə istifadə olunur. Məsələn, rokfor, stilton, bri və kamamber pendirlərinin özünəməxsus dad və qoxusu Penicillium roqueforti və Penicillium camemberti göbələkləri sayəsində formalaşır.

Təhlükəli sayılan kiflər isə əsasən yaşıl, qara və ya qırmızımtıl rəngdə olur. Bu növlər, xüsusən Aspergillus və Penicillium commune cinsinə aid göbələklər, orqanizm üçün zərərli toksinlər hasil edə bilir.

Professorun sözlərinə görə, Penicillium commune növü “tsiklopiazonav turşusu” adlı mikotoksin yaradır ki, bu da hüceyrə membranlarında kalsium mübadiləsini poza, əzələ və sinir sisteminin fəaliyyətini zəiflədə bilər.

Xoşbəxtlikdən, belə hallara nadirən rast gəlinir, çünki korlanmış süd məhsulları adətən iti, turş qoxusu ilə asanlıqla tanınır.