Qidalanma ilə immun sisteminin güclü əlaqəsi olduğu elmi cəhətdən sübut edilib. Həkimlər bildirirlər ki, bağırsaq sağlamlığı və selikli qişaların bütövlüyü orqanizmin infeksiyalara qarşı müdafiəsində həlledici rol oynayır. Foodinfo.az xarici mediaya istinadla xəbər verir ki, qastroenteroloq Yekaterina Kaşux bu mövzuda vacib məqamları açıqlayıb.
Mütəxəssisin sözlərinə görə, insan immun sisteminin böyük hissəsi məhz bağırsaqlarda yerləşir. Buraya limfositlər, makrofaqlar və immunoqlobulinlər istehsal edən plazma hüceyrələri daxildir. Buna görə də gündəlik qidalanma vərdişləri orqanizmin virus və bakteriyalara qarşı müqavimətini birbaşa müəyyən edir.
Bağırsaq mikrobiotası qida ilə immunitet arasında əsas vasitəçi rolunu oynayır. Onun balansı həm yerli bağırsaq immunitetinə, həm də ümumi müdafiə mexanizmlərinə ciddi təsir göstərir. Həkim vurğulayır ki, tək bir “möcüzəvi” məhsul axtarmaq düzgün yanaşma deyil, əsas məsələ balanslı və müxtəlif rasiondur.
İlk növbədə zülal qəbulu xüsusi əhəmiyyət daşıyır. Ət, balıq, yumurta və paxlalılar immun hüceyrələrin və anticisimlərin əsas tikinti materialı hesab olunur. Zülal çatışmazlığı immun reaksiyaların zəifləməsinə səbəb ola bilər.
Liflə zəngin qidalar da immun sisteminin güclənməsində mühüm rol oynayır. Tərəvəzlər, meyvələr, tam taxıllar və paxlalılardan alınan liflər faydalı bağırsaq bakteriyaları üçün əsas qida mənbəyidir. Bu bakteriyalar lifləri parçalayaraq immun tənzimlənməsində iştirak edən yağ turşuları sintez edirlər.
Vitamin və minerallar immun proseslərin tənzimləyicisi kimi çıxış edir. C vitamini immun hüceyrələrin fəaliyyətini dəstəkləyir, sink anticisimlərin sintezi və selikli qişaların bərpası üçün vacibdir. D vitamini isə immun cavabın formalaşmasında mühüm rol oynayır və əsasən yağlı balıq və yumurta sarısından əldə olunur.
Rasionda probiotiklərə də yer verilməsi tövsiyə olunur. Kefir, yoqurt, turş kələm və digər fermentləşdirilmiş məhsullar bağırsaqlara faydalı bakteriyalar qazandırır. Bundan əlavə, giləmeyvə, yaşıl çay və qoz-fındıq kimi polifenollarla zəngin qidalar antioksidant təsir göstərərək hüceyrələri zədələnmədən qoruyur.
Mütəxəssislər qeyd edirlər ki, güclü immunitetin sirri gündəlik olaraq bağırsaq sağlamlığına diqqət yetirmək, yəni tamdəyərli, balanslı və müxtəlif qidalanma rejiminə əməl etməkdir.
