Bir çox insan qan şəkərinə nəzarət edən zaman şokoladdan tamamilə imtina etməyin vacib olduğunu düşünür. Lakin mütəxəssislər bildirirlər ki, düzgün seçildikdə və ölçülü istifadə olunduqda tünd şokolad sağlamlığa mənfi deyil, əksinə faydalı ola bilər. Foodinfo.az Sports.kz saytına istinadla xəbər verir ki, bu barədə Eatingwell.com nəşrində dərc olunan araşdırma və dietoloqların rəylərində qeyd olunub.
Araşdırmalara görə, tünd şokoladın tərkibində olan kakao polifenolları güclü antioksidant təsirə malikdir və yeməkdən sonra orqanizmin qlükozanı daha səmərəli mənimsəməsinə kömək edir. Məlum olub ki, qlükoza dözümlülük sınağından əvvəl tünd şokolad əsaslı içki qəbul edən şəxslərdə iki saat sonra qan şəkərinin səviyyəsi nəzarət qrupuna nisbətən daha aşağı olub.
Diabet üzrə qidalanma mütəxəssisi Erin Palininski-Ueyd bildirib ki, diabet və ya diabetə meyilli şəxslər tünd şokoladdan düzgün şəkildə istifadə etdikdə qan şəkərində kəskin artım yaşamaya bilərlər. Onun sözlərinə görə, tünd şokoladın lif, zülal və faydalı yağlarla birlikdə qəbulu qan şəkərinin sabit qalmasına kömək edir və şirniyyat istəyini sağlam yolla azaldır.
Nutrisiyoloq Lorena Draqo isə vurğulayıb ki, tünd şokoladı digər növlərdən fərqləndirən əsas xüsusiyyət kakao miqdarının yüksək olmasıdır. Kakao polifenollarla zəngindir, damarların fəaliyyətini dəstəkləyir və qanda şəkərin tənzimlənməsinə müsbət təsir göstərə bilər.
Tədqiqatlar göstərir ki, ikinci tip şəkərli diabeti olan insanlarda tünd şokolad istehlakı acqarına qan şəkərinin daha yaxşı göstəriciləri və insulinə həssaslığın artması ilə əlaqələndirilir. Həmçinin həftədə azı beş porsiya tünd şokolad yeyən şəxslərdə ikinci tip diabetin yaranma riskinin təxminən 21 faiz daha az olduğu müşahidə olunub.
Dietoloqlar tünd şokolad seçərkən kakao tərkibinin azı 70 faiz olmasını tövsiyə edirlər. Onlar həmçinin porsiya ölçüsünə diqqət yetirməyi məsləhət görürlər. Təxminən 30 qram tünd şokolad həm şirniyyat ehtiyacını ödəyir, həm də artıq kalori qəbulunun qarşısını alır.
Mütəxəssislərin fikrincə, şəkərsiz və ya steviya, eritrit və inulinlə şirinləşdirilmiş tünd şokolad növləri daha məqsədəuyğundur. Belə seçimlər qan şəkərinə daha az təsir edir və sağlam qidalanma prinsiplərinə uyğun hesab olunur.
