Bulyon sadə yemək kimi görünsə də, dadlı və keyfiyyətli alınması üçün xırda detallara xüsusi diqqət tələb edir. Ən çox müzakirə olunan məsələlərdən biri ətin bişirməzdən əvvəl yuyulub-yuyulmaması və hansı suda qaynadılmasıdır. Foodinfo.az Sports.kz-ə istinadla xəbər verir ki, mütəxəssislər düzgün bulyon üçün həm ət seçiminin, həm də bişirmə ardıcıllığının vacib olduğunu bildirirlər.

Məlumata görə, dadlı və qatı bulyonun əsasını düzgün seçilmiş ət təşkil edir. Klassik variant kimi quş əti ilə mal ətinin birlikdə istifadəsi tövsiyə olunur. Adətən iki hissə toyuq və bir hissə mal əti ideal nisbət sayılır. Toyuq əti olaraq cavan cücə və ya ev toyuğu, mal əti üçün isə döş hissəsi uyğun hesab olunur.

İstəyə görə mal əti dana əti ilə əvəz edilə bilər ki, bu da bulyona daha yumşaq dad verir. Ənənəvi mətbəxi sevənlər bəzən dovşan və ya göyərçin ətindən də bulyon hazırlayırlar. Bu cür reseptlər qədimdən tanınır və xüsusi dadı ilə seçilir.

Mütəxəssislər bildirirlər ki, ət bişirməzdən əvvəl axar soyuq su altında qısa müddət yuyulmalıdır. Bu, səthdəki mümkün çirkləri təmizləmək üçün kifayətdir. Daha sonra ət mütləq soyuq suya qoyulmalı və tədricən qızdırılmalıdır. Məhz bu üsul ətin dad və ətirini bulyona tam ötürməsinə imkan verir.

Əgər ət birbaşa qaynar suya salınarsa, onun səthi bərkiyir və bulyon kifayət qədər ləzzətli alınmır. Bu səbəbdən əvvəlcə ət bişirilir, tərəvəzlər isə sonrakı mərhələdə əlavə olunur.

Dadlı bulyon üçün tərəvəzlərin rolu da böyükdür. Bir yarım kiloqram toyuq və yarım kiloqram mal əti üçün kök, kərəviz, cəfəri kökü, pırasə, sobada azca qızardılmış soğan, ağ kələmin bir neçə yarpağı, həmçinin şüyüd və cəfəri tövsiyə olunur. Tərəvəzlərin iri doğranması bulyonun dadını daha zəngin edir.

Əsl bulyonun əsas üstünlüyü onun təbii dadıdır. Buna görə də ədviyyatlardan ölçülü istifadə edilməlidir. Duz və təzə üyüdülmüş qara istiotun süfrədə, boşqabda əlavə olunması daha məqsədəuyğun sayılır. Bulyon digər şorbalar üçün əsas kimi istifadə ediləcəksə, dəfnə yarpağı və ətirli istiot əlavə edilə bilər.