Şokoladın sağlamlığa təsiri ilə bağlı aparılan araşdırmalar bu məhsula marağı daha da artırır. Son elmi müşahidələr göstərir ki, kakao tərkibli məhsullar orqanizmdə yaşlanma prosesləri ilə əlaqəli ola bilər. Foodinfo.az Sports.kz-ə istinadla xəbər verir ki, tibb elmləri namizədi Mixail Bolkov şokoladın bioloji yaşın yavaşlaması ilə bağlı mümkün təsirlərindən danışıb.

Mütəxəssisin sözlərinə görə, bioloji yaşın müəyyən edilmə üsullarından biri genlərin açıq və qapalı sahələrinin nisbətinin təhlilidir. Yaş artdıqca bu nisbət dəyişir və bu da epigenetik yaşlanmanın sürətini qiymətləndirməyə imkan verir. Aparılan son araşdırmada alimlər bu göstəriciləri kakao və şokoladda olan teobromin maddəsinin səviyyəsi ilə müqayisə ediblər.

Nəticələr göstərib ki, orqanizmdə teobrominin yüksək səviyyəsi müşahidə olunan insanlarda bioloji yaşlanma prosesi daha yavaş gedir. Alimlər bunu maraqlı uyğunluq kimi qiymətləndirirlər. Bununla belə, mütəxəssis bu nəticələrə ehtiyatla yanaşılmalı olduğunu vurğulayıb.

Onun sözlərinə görə, tədqiqat yalnız müəyyən qanunauyğunluğu üzə çıxarıb, lakin səbəb-nəticə əlaqəsi sübut olunmayıb. Yəni yaşlanmanın ləngiməsi birbaşa şokolad istehlakı ilə bağlı olmaya da bilər. Mümkündür ki, daha sağlam həyat tərzi keçirən insanlar eyni zamanda şokolad yeməyi də sevirlər.

Bununla yanaşı, alim şokoladın faydalı xüsusiyyətlərinin danılmaz olduğunu qeyd edib. Şokoladın tərkibində olan polifenolların iltihabəleyhinə təsiri elmi cəhətdən təsdiqlənib. Bu maddələr orqanizmdə hüceyrə səviyyəsində qoruyucu rol oynayır.

Mixail Bolkov hesab edir ki, əldə edilən yeni məlumatlar şokoladın ölçülü şəkildə qidalanmaya daxil edilməsinin faydasını bir daha göstərir. Mütəxəssislər vurğulayırlar ki, sağlam təsir üçün əsas şərt miqdarın normada saxlanılmasıdır.