Qripin adi soyuqdəymədən fərqləndirilməsində ən mühüm əlamət xəstəliyin qəfil başlamasıdır. Foodinfo.az Sports.kz-ya istinadla xəbər verir ki, Piroqov adına Tibb Universitetinin yoluxucu xəstəliklər üzrə mütəxəssisi, dosent İvan Konovalov bu barədə geniş məlumat verib.

Mütəxəssisin sözlərinə görə, qrip çox vaxt qəfil başlayır və xəstə özünü pis hiss etdiyi dəqiq vaxtı belə xatırlaya bilir. O bildirib ki, xəstəliyin ilk saatlarında bədən hərarəti sürətlə 39–40 dərəcəyə qədər yüksəlir, bədən sızıldaması, güclü baş ağrısı və ümumi yorğunluq özünü göstərir.

Konovalov vurğulayıb ki, digər tənəffüs yolları iltihablarında burun axması daha qabarıq olur, lakin qripdə bu əlamət zəif şəkildə görünə bilər. Bunun əvəzində boğazda ağrı və göynəmə, həmçinin tez bir zamanda yaranan quru öskürək daha xarakterikdir.

Onun sözlərinə görə, son illərdə əsasən üç virus tipi dövriyyədə olur: iki növ A qripi (H1N1 və H3N2) və bir B qripi xətti (Viktoriya). Hər il hazırlanan peyvəndlər məhz bu virus dəyişiklikləri nəzərə alınaraq tənzimlənir.

Mütəxəssis diqqətə çatdırıb ki, qripin əsas təhlükəsi onun ağırlaşmalarında gizlənir. Bunlara virus sətəlcəmi, ürək əzələsinin iltihabı, sinir sistemi və böyrəklərlə bağlı fəsadlar, eləcə də damar zədələnmələri daxildir. Qrip immuniteti zəiflətdiyi üçün bakterial infeksiyalara yol açır və xəstəlik daha ağır keçir.

O qeyd edib ki, xəstəliyin ağırlaşma ehtimalını azaltmağın ən təsirli yolu peyvənddir. Ən uyğun vaxt payız ayları hesab edilsə də, epidemiya mövsümü boyunca, hətta yazadək peyvənd vurulması mümkündür. Bu, xüsusilə uşaqlar, yaşlılar, hamilələr və xroniki xəstəlikləri olanlar üçün həyati əhəmiyyət daşıyır.

Konovalov əlavə edib ki, profilaktika tədbirləri də mühüm rol oynayır. Otaqların tez-tez havalandırılması, əllərin gigiyenasına ciddi əməl edilməsi və xəstəlik dövrlərində insan sıxlığı olan yerlərə az çıxmaq riskləri xeyli azalda bilər.

Mütəxəssis xəbərdarlıq edir ki, qrip əlamətləri müşahidə olunduqda vaxtında həkimə müraciət edilməsi həm fəsadların qarşısını almağa, həm də xəstəliyin yüngül keçməsinə kömək edir.