Gündəlik rasionda duzun normadan artıq istifadəsi ilə bağlı aparılan son tədqiqatlar bu vərdişin ciddi sağlamlıq problemlərinə yol aça biləcəyini göstərir. Mütəxəssislər bildirir ki, bir çox insan fərqində olmadan tövsiyə edilən gündəlik normadan daha çox duz qəbul edir və bu da uzunmüddətli riskləri artırır.

Foodinfo.az “The New York Times” qəzetinə istinadla xəbər verir ki, kardioloq doktor Andrew Freeman qeyd edib ki, yüksək miqdarda duz qəbulu arterial təzyiqin yüksəlməsinə səbəb olur və bu da ürək-damar xəstəlikləri riskini əhəmiyyətli dərəcədə artırır. Onun sözlərinə görə, xüsusilə emal olunmuş qidalarda gizli duz miqdarı çox olur və bu məhsulların tez-tez istehlakı sağlamlığa mənfi təsir göstərir.

Mütəxəssis əlavə edib ki, duz istifadəsini azaltmaq üçün təbii və təzə məhsullara üstünlük vermək, yeməklərdə ədviyyatlardan istifadəni artırmaq və hazır qidalardan mümkün qədər uzaq durmaq tövsiyə olunur. Bu yanaşma həm qan təzyiqinin nəzarətdə saxlanmasına, həm də ümumi sağlamlığın qorunmasına kömək edir.